Internet Services in Pulwama پلوامہ کے علاقوں میں موبائل انٹرنیٹ خدمات معطل

جنوبی کشمیر کے ضلع پلوامہ کے دو علاقوں میں موبائل انٹرنیٹ خدمات کو سکیورٹی وجوہات کے باعث معطل کردیا گیا ہے۔

سری نگر: جنوبی کشمیر کے ضلع پلوامہ کے وامپورہ اور ہانی پورہ علاقوں میں موبائیل انٹریٹ خدمات کو معطل کرنے کے احکامات صادر کئے گئے ہیں۔ ذرائع کے مطابق سیکورٹی وجوہات کی بناء پر ان دو دیہی علاقوں میں موبائیل انٹرنیٹ کو آج شام تک معطل رکھنے کی ہدایت دی گئی ہے۔

محکمہ داخلہ کی جانب سے جاری کئے گئے ایک حکم نامہ زیر نمبر 8(TSTS)2023کے مطابق ٹیلی کام سروسز فراہم کرنے والی کمپنیوں کو ہدایت دی گئی ہے کہ وہ پلوامہ کے وامپورہ اور ہانی پورہ علاقوں میں 5نومبر کی شام سات بجے لے کر 8نومبر شام سات بجے تک موبائیل خدمات کو معطل رکھے۔ حکم نامہ میں مزید کہا گیا ہے کہ ملک دشمن عناصر کی جانب سے موبائیل ڈیٹا سروسز کے غلط استعمال ہونے کا امکان ہے جس کے پیش نظر موبائیل انٹرنیٹ خدمات کو بند رکھنا ناگزیر بن گیا ہے۔

واضح رہے کہ وادی کشمیر میں اس سے پہلے بھی مختلف وجوہات کے باعث انٹرنیٹ خدمات کو معطل کیا گیا تھا۔ جولائی سنہ 2016 لشکر طیبہ کے کمانڈر برہان کی ہلاکت کے بعد تو وادی کشمیر میں تقریبا چار ماہ کرفیو نافذ کردیا گیا تھا اس دوران انٹرنیٹ خدمات کو بھی معطل کردیا گیا۔ برہان وانی کی ہلاکت کے خلاف پورے کشمیر میں احتجاجی مظاہرے کیے جارہے تھے ان احتجاجی مظاہروں کو روکنے کے لئے کرفیو نافذ کیا گیا تھا۔ اس کے علاوہ بھی سکیورٹی وجوہات کے باعث انٹرنیٹ خدمات کو معطل کیا جاتا ہے۔

یو این آئی مشمولات