پلوامہ:بھارت میں نیشنل کونسل آف ایجوکیشنل ریسرچ اینڈ ٹریننگ (این سی ای آر ٹی) نے 12ویں جماعت کے نصاب سے مغلیہ دور حکومت سے متعلق بعض ابواب کو ہٹانے کا فیصلہ کیا، جس پر سیاسی رہنما رد عمل کا اظہار کر رہے ہیں۔ پیپلز ڈیمو کریٹک پارٹی (پی ڈی پی) کے ترجمان ڈاکٹر ہربخش سنگھ نے پلوامہ کے ترال میں ایک تقریب میں شرکت کی، جس کے بعد انہوں نے صحافیوں سے بات کرتے ہوئے کہا کہ تاریخ کو مٹایا نہیں جاسکتا ہے اور اگر تاریخ کے ساتھ چھیڑ چھاڑ کی جائے تو اس کے منفی نتائج سامنے آسکتے ہیں۔ ڈاکٹر ہر بخش نے بتایا کہ تاریخ بدلنے کی جو کوششیں ملک میں کی جا رہی ہیں وہ ملک کی سالمیت اور بھائی چارے کے لیے ٹھیک نہیں ہے۔
ڈاکٹر ہربخش سنگھ نے بتایا کہ یہ بڑی بدقسمتی کی بات ہے کہ ملک میں کچھ عناصر مذہبی منافرت کو ہوا دے رہے ہیں جس کی وجہ سے ملک کی گنگا جمنی تہذیب داغ دار ہورہی ہے۔ انہوں نے مزید بتایا کہ ہمارا ملک ایک کثیر ثقافتی ملک ہے اور آئین ہر شخص کو اپنے حساب سے زندگی گزارنے کا حق دیتا ہے۔ وہیں انہوں نے ریاست ہریانہ کی ایک امامِ مسجد کے ساتھ مارپیٹ کی بھی سخت الفاظ میں مذمت کی۔