پلوامہ: اسمگلروں کا فاریسٹ عملہ پر حملہ، ایک ملازم زخمی

جنوبی کشمیر کے ضلع پلوامہ میں محکمہ جنگلات کے عملہ نے سمگلروں کے خلاف کارروائی کرتے ہوئے اسمگل کی جارہی کئی مکعب فٹ عمارتی لکڑی ضبط کر لی، تاہم اسمگلروں نے عملہ پر حملہ کرکے ایک فاریسٹ ملازم کو زخمی کر دیا۔

ضلع پلوامہ کے اگلر علاقے میں سمگلروں نے محکمہ جنگلات کے ملازمین پر اُس وقت حملہ کیا جب محکمہ جنگلات کے ملازمین نے خفیہ اطلاع موصول ہونے کے بعد اسمگلروں کو عمارتی لکڑی لے جاتے ہوئے دھر لیا۔

اسمگلروں نے عملہ پر حملہ کرکے محکمہ فاریسٹ کے ایک ملازم کو زخمی کر دیا۔ تاہم اسمگلر بھاگ نکلنے میں کامیاب ہو گئے۔

انچارج فاریسٹ کنٹرول روم پلوامہ میر شفقت نے ای ٹی وی بھارت کے ساتھ بات کرتے ہوئے کہا کہ انہوں نے دوران شب اسمگلروں کو عمارتی لکڑی لے جاتے ہوئے دھر لیا۔ تاہم وہ اندھیرے کا فائدہ اٹھا کر بھاگ نکلنے میں کامیاب ہو گئے۔

انہوں نے کہا کہ اسمگلروں کی ٹولی نے ان پر حملہ کیا جس کے نتیجے میں ہلال احمد وانی نامی ایک فاریسٹ ملازم زخمی ہو گئے۔

چھاپے کے دوران محکمہ کے اہلکاروں نے اسمگل کی جا رہی کئی مکعب عمارتی لکڑی ضبط کر لی۔

وہیں پولیس کے ایک عہدیدار نے بتایا کہ مجرموں کی شناخت کی جا رہی ہے اور ان کے خلاف متعلقہ تھانے میں ایف آئی آر درج کی جائے گی۔