اونتی پورہ میں تصادم، ایک فوجی جوان اور ایک پولیس اہلکار ہلاک

جنوبی کشمیر کے اونتی پورہ کے کھریو علاقہ میں منگل کی صبح ہونے والے ایک تصادم میں دو عسکریت پسندوں، ایک فوجی جوان اور ایک پولیس اہلکار کے ہلاک ہونے کی خبر ہے تاہم ابھی تک عسکریت پسندوں کی لاشیں نہیں ملی ہیں۔

سرکاری ذرائع نے مسلح تصادم کی تفصیلات فراہم کرتے ہوئے کہا کہ اونتی پورہ کے کھریو میں عسکریت پسندوں کی موجودگی سے متعلق خفیہ اطلاع ملنے پر فوج، جموں وکشمیر پولیس اور سی آر پی ایف نے مذکورہ علاقہ کو منگل کو علی الصبح محاصرے میں لے لیا۔

انہوں نے کہا کہ تلاشی آپریشن کے دوران علاقہ میں موجود عسکریت پسندوں نے فورسز پر فائرنگ کی اور جوابی فائرنگ میں دو عسکریت پسند ہلاک کیے گئے۔ تصادم میں ایک فوجی جوان اور ایک پولیس اہلکار ہلاک ہو گئے ہیں۔

ہلاک شدہ پولیس اہلکار کی شناخت راجوری سے تعلق رکھنے والے شہباز احمد کے طور پر ہوئی ہے۔

تصادم میں ایک اور پولیس اہلکار کے زخمی ہونے کی خبر ہے جنہیں فوری طور ہسپتال منتقل کیا گیا ہے۔

گزشتہ روز جنوبی ضلع شوپیاں کے وچی علاقہ میں ہوئے تصادم میں حزب المجاہدین سے وابستہ تین عسکریت پسند ہلاک ہوئے تھے۔