پلوامہ: گھر گھر جا کر ویکسین لگانے کا منصوبہ

اے ڈی سی نے تمام محکمہ جات سے اس حوالے سے ڈاٹا طلب کیا اور ان کو موقع پر ہی ہدایت دی گئی کہ 45 سال سے زائد عمر والے جن افراد نے ابھی تک ویکسین نہیں کیا ہے، آنے والے چند دنوں کے اندر اندر اُن افراد کی گھر گھر جاکر نشاندہی کرنے کے ساتھ ساتھ اُن کا ویکسین بھی کیا جائے۔

ضلع پلوامہ کے ٹاؤن ہال پانپور میں آج اے ڈی سی اونتی پورہ ظفر حُسین شال کی سربراہی میں ایک میٹنگ کا انعقاد کیا گیا۔ جس میں آنے والے دنوں میں بلاک پانپور کے 45 سال سے زائد عمر کے افراد کے سو فیصد ویکسینیشن پر زور دینے کے ساتھ ساتھ کورونا وائرس ٹیسٹنگ کو تیز کرنے پر بھی زور دیا گیا۔

اس موقع پر سی ایم او پلوامہ، ڈپٹی سی ایم او پلوامہ، بی ایم او پانپور، بلاک ڈیولپمنٹ آفیسر پانپور کے علاوہ متعلقہ محکمہ جات سے تعلق رکھنے والے افسران بھی موجود رہے۔

اے ڈی سی نے تمام محکمہ جات سے اس حوالے سے ڈاٹا طلب کیا اور ان کو موقع پر ہی ہدایت دی گئی کہ 45 سال سے زائد عمر والے جن افراد نے ابھی تک ویکسین نہیں کیا ہے، آنے والے چند دنوں کے اندر اندر اُن افراد کی گھر گھر جاکر نشاندہی کرنے کے ساتھ ساتھ اُن کا ویکسین بھی کیا جائے۔

بلاک میڈیکل آفیسر پانپور ڈاکٹر عاصمہ نذیر نے اس حوالے سے جانکاری دیتے ہوئے کہا کہ ہمارے میڈیکل بلاک میں 40 سے بھی زائد ٹیمیں تشکیل دی گئی ہیں جو کل سے گھر گھر جاکر اس پروگرام کو عملاً انجام دیں گے تاکہ آنے والے دنوں میں ویکسینیشن کے حوالے سے ہمارا ہدف مکمل ہو۔

ڈاکٹر عاصمہ نزیر نے پانپور بلاک کے لوگوں سے اپیل کی کہ افواہوں پر دھیان نہ دیں بلکہ ویکسین ہی اس وقت اس وبائی صورتحال سے نمٹنے کا ایک واحد ذریعہ ہے۔ انہوں نے کہا کہ ہمارے عملے کو تعاون دیں اور انشاءاللہ آنے والے کچھ دنوں میں ہم اس گراف کو کم کرنے میں کامیاب ہو جایں گے۔