DDC Member Visits Guph Kral Tral ڈی ڈی سی ممبر نے گپھ کرال غار کا دورہ کیا

ڈی ڈی سی ممبر، ترال ہربخش سنگھ نے ترال کے گپھ کرال کا دورہ کرکے تاریخی اہمیت کے حامل غاروں کی خستہ حالی پر گہری تشویش کا اظہار کیا۔

پلوامہ (جموں کشمیر):ڈی ڈی سی ممبر ترال، ڈاکٹر ہربخش سنگھ نے جنوبی کشمیر کے ترال علاقے کا دورہ کیا۔ دورے کے دوران ڈی ڈی سی ممبر نے ترال کے تاریخی مقام گپھ کرال کا دورہ کرکے قدیم غاروں کا جائزہ لیا۔ دورے کے دوران مقامی باشندوں نے ڈی ڈی سی ممبر کو علاقے میں درپیش مسائل سے آگاہ کیا۔ موصوف نے مسائل کو ترجیحی بنیادوں پر حل کرنے کی یقین دہانی کی۔ ڈی ڈی سی ممبر نے بعد ازاں ترال کے ہردومیر علاقے میں دیہی ترقی کی جانب سے تعمیر کی گئی ایک سڑک کا افتتاح کیا اور امیرآباد میں بھی کئی کاموں کا جایزہ لیا۔

ڈاکٹر ہربخش نے گپھ، کرال کے تاریخی غاروں کی ابتر صورتحال پر ناراضگی کا اظہار کرتے ہوئے کہا: ’’تاریخی اہمیت کے حامل یہ غار، آج زبوں حالی کی داستان بیان کر رہے ہیں اور محکمہ آثار قدیمہ اس حوالے سے غیر سنجیدگی کا مظاہرہ کر رہی ہے۔‘‘ انہوں نے ای ٹی وی بھارت کے ساتھ بات کرتے ہوئے کہا کہ وہ یہ معاملات جموں کشمیر کے لیفٹیننٹ گورنر منوج سنہا کی نوٹس میں لانے کی سعی کریں گے تاکہ ان تاریخی غاروں کو آنے والی نسلوں تک محفوظ بنانے کے لیے ٹھوس اقدامات کیے جائیں۔

واضح رہے کہ ترال ٹاؤن سے محض دو کلومیٹر کی دوری پر واقع غار قدیم تاریخ کا ایک حصہ ہے اور اور مقامی باشندوں کا ماننا ہے کہ یہ غار برزہامہ غاروں سے بھی قدیم ہیں۔ ڈی ڈی سی ممبر نے مزید کہا کہ وہ آرکیولاجی آف انڈیا سے بھی خط و کتابت کے ذریعے ان غاروں کے تحفظ کو یقینی بنائے جانے کی اپیل کریں گے۔