جنوبی کشمیر کے ضلع اونتی پورہ میں آل انڈیا انسٹی ٹیوٹ آف میڈیکل سائنس کے تعمیراتی کام کا جائزہ لینے کے لیے ضلع ترقیاتی کمشنر پلوامہ ڈاکٹر راگھو لنگر نے آج ایمز سائٹ کا دورہ کیا اور وہاں ہو رہے کام کاج کا جائزہ لیا اور متعلقہ حکام کے ساتھ اس اہم پروجیکٹ کے حوالے سے گفت و شنید کی۔
اس موقع پر ایڈیشنل ڈپٹی کمشنر اونتی پورہ ظفر شال اور دیگر آفسرز بھی موجود تھے۔
میڈیا سے گفتگو کرتے ہوئے ضلع ترقیاتی کمشنر پلوامہ ڈاکٹر راگھو لنگر نے بتایا کہ 'ایمز کا پروجیکٹ ایک فلیگ شپ پروگرام ہے جس کا پہلا مرحلہ 2024 مئی میں مکمل ہوگا اور آج انہوں نے تعمیراتی کام کا جائزہ لیا ہے جو سردی کے باوجود جاری ہے اور انھیں امید ہے کہ ایمز جیسے ادارے کا کام مقررہ وقت پر مکمل ہوگا۔'
مزید پڑھیں:سرینگر میں ٹریفک پولیس کی بیداری مہم جاری
واضح رہے کہ مرکزی حکومت نے چند سال قبل جموں کے سانبہ اور کشمیر کے اونتی پورہ میں ایمز اداروں کی تعمیر کو منظوری دی تھی جس کے بعد وادی کے لوگوں نے راحت کی سانس لی کیونکہ وادی میں صحت عامہ کے حوالے سے عوام کو بہت مشکلات درپیش ہیں۔
