Meri mitti mera desh campaign: پلوامہ میں ثقافتی و تمدنی پروگرام منعقد

گورنمنٹ بائز ہائیر سیکنڈری اسکول، پلوامہ میں بھی ’’میری مٹی میرا دیش‘‘ مہم کے تحت منعقدہ ثقافتی پروگرام میں اسکولی بچوں کی خاصی تعداد نے شرکت کی۔

پلوامہ:وادی کے دیگر اضلاع طرح جنوبی کشمیر کے ضلع پلوامہ میں بھی حکومتی احکامات کے پیش نظر ’’میری مٹی میرا دیش‘‘ مہم کے تحت متعدد پروگرامز کا انعقاد کیا جا رہا ہے۔ منتظمین کے مطابق یہ ’’ملک کے ان شہیدوں - جنہوں نے آزادی کی خاطر اپنی جانوں کا نذرانہ پیش کیا - کو خراج تحسین پیش کرنے کی غرض سے وضع کی گئی ہے اور اس کے ذریعے نئی نسل کو بھی آزادی کے ہیروز کا تعارف ہو جائے گا۔

اسی سلسلے کے تحت ڈسٹرکٹ انفارمیشن سینٹر پلوامہ، گورنمنٹ گرلز ہائیر سکینڈری اسکول اور گورنمنٹ بائز ہائیر سیکنڈری اسکول کے ساتھ ساتھ ڈیپارٹمنٹ آف انفارمیشن اینڈ پبلک ریلیشنز نے ایک ثقافتی تقریب کا انعقاد عمل میں لایا جس میں کثیر تعداد میں طلبہ نے شرکت کی۔ پروگرام کے دوران طلبہ و طالبات نے کئی ثقافتی اور تمدنی پروگرامز پیش کیے جس کے لئے ان کی حوصلہ افزائی کی گئی۔ پروگرام میں دونوں اسکولوں کے پرنسپلز، ڈسٹرکٹ انفارمیشن آفیسر، پلوامہ، نوشاد احمد کے علاوہ دیگر افسران اور اسکول اساتذہ و عملہ نے شرکت کی۔

اس موقع پر بچوں نے خوشی کا اظہار کرتے ہوئے مستقبل میں بھی اس طرح کے پروگرام منعقد کیے جانے کی امید ظاہر کی۔ اس موقع پر ڈسٹرکٹ انفارمیشن آفیسر پلوامہ نے میڈیا نمائندوں کے ساتھ بات کرتے ہوئے کہا کہ ’’ملک بھر میں ’میری مٹی میرا دیش‘ مہم جاری ہے جس کے تحت مختلف پروگرامز کا انعقاد کیا جانا ہے اور اسی سلسلے کے تحت ہم نے بھی یہ پروگرام منعقد کیا جس میں اسکولی بچوں کی ایک اچھی تعداد نے شرکت کی۔‘‘