سی پی ڈبلیو ورکر کی جانب سے ماسک تقسیم

کورونا وائرس کے بڑھتے ہوئے واقعات سے سب ضلع ترال کے لوگوں میں تشویش پائی جا رہی ہے، اسی لیے کورونا وائرس کے ساتھ جنگ میں معمولی اجرتوں پر کام کر رہے ملازمین بھی اپنا کردار ادا کر رہے ہیں۔

ضلع پلوامہ کے سب ضلع ترال سے تعلق رکھنے والے ڈاڈسرہ گاؤں کے رہنے فیاض احمد شیخ جو کہ محکمہ تعلیم میں بطور کنٹنجنٹ پیڈ ورکر کام رہے ہیں نے اپنے پیسوں سے ماسک خرد کر اپنے سکول گورنمنٹ مڈل سکول چندریگام ترال کے طلباء میں تقسیم کیے۔ اس حوالے سے آج اس سکول میں ایک تقریب منعقد ہوئی جہاں زونل ایجوکیشن آفیسر اونتی پورہ محمد یوسف مہمان خصوصی کے طور پر شامل ہوئے۔ اس موقع پر سماجی دوریوں کا لحاظ رکھتے ہوئے فیاض احمد کی طرف سے خریدی گئی ماسک تقسیمِ کیے گئے۔

ای ٹی وی بھارت کے ساتھ بات کرتے ہوئے شیخ فیاض نے بتایا کہ 'سماجی ذمہ داریوں کا احساس کرتے ہوئے یہ ماسک تقسیم کیے ہیں۔' انہوں نے لوگوں سے کورونا وائرس کو نظر انداز نہ کرنے کی صلاح دی اور رہنما خطوط کی پاسداری کرنے کا مشورہ دیا۔

زیڈ ای او اونتی پورہ محمد یوسف نے بتایا کہ فیاض جیسے لوگوں کی وجہ سے محکمے کا وقار بلند ہو گیا ہے اور وہ اس کے جزبہ ایثار کی قدر کر رہے ہیں۔