اونتی پورہ: قرنطینہ مکمل کرکے 80 افراد واپس گھر روانہ

وادی کشمیر میں کورونا وائرس کے واقعات کے درمیان آج جنوبی کشمیر کے اونتی پورہ علاقے میں قرنطینہ کی مدت کو پورا کرنے پر قریباً 80 افراد کو گھروں کی طرف روانہ کیا گیا۔

تفصیلات کے مطابق اسلامک یونیورسٹی آف سائنس اینڈ ٹیکنالوجی اونتی پورہ میں قایم قرنطینہ سینٹر میں 14 روز کی معیاد کو مکمل کرنے پر آج ان افراد کو اپنے اپنے گھروں کے لیے روانہ کیا گیا۔

اس موقع پرانتظامیہ کے کئی عہدیدار اور ڈاکٹروں کی ایک ٹیم بھی موجود تھی جنہوں نے گرمجوشی کے ساتھ قرنطینہ کی مدت کو پورا کرنے والے افراد کو الوداع کہا۔

قرنطینہ سینٹر میں رہنے والے محمد لطیف نامی شخص نے انتظامیہ کی جانب سے انھیں فراہم کردہ سہولیات پر اطمینان کا اظہار کیا ۔

میڈیا کے ساتھ بات کرتے ہوئے نوڈل آفیسر سہیل احمد نے بتایا کہ چودہ دن کا قرنطینہ مکمل کرنے کے بعد ان افراد کو گھروں کے لیے روانہ کیا گیا ہے انہوں نے عوام سے ٹراول ہسٹری نہ چھپانے کی اپیل بھی کی۔