Corruption free JK: بھرشٹا چار مکت جموں و کشمیر مہم کی نسبت سے پلوامہ میں تقریب

جموں و کشمیر میں انتظامیہ کی ہدایت پر ’’بھرشٹاچار مکت جموں و کشمیر‘‘ کی نسبت سے ہفتہ بھر پروگرامز کا سلسلہ جاری رہے گا۔ جنوبی کشمیر کے پلوامہ ضلع میں بھی اس مہم کے تحت تقاریب کا سلسلہ شروع ہوا۔

پلوامہ (جموں کشمیر) :ڈپٹی کمشنر، پلوامہ، ڈاکٹر بشارت قیوم نے ٹاؤن ہال پلوامہ میں ہفتہ بھر جاری رہنے والے ’’بھرشٹاچار مکت جے اینڈ کے‘‘ مہم کی نسبت سے ہفتہ بھر جاری رہنے والے پروگرامز کا رسمی طور افتتاح کیا۔ افتتاحی تقریب کے موقع پر ڈپٹی کمشنر نے مختلف محکمہ جات سے تعلق رکھنے والے ملازمین، افسران سے خطاب کرتے ہوئے کہا کہ وہ انتظامیہ کی جانب سے شفاف نظام کے لیے کیے جا رہے تمام اقدامات کو عوام تک پہنچانے کی پوری سعی کریں انہوں نے اس بات پر زور دیا کہ اس مہم کی تشہیر کے لیے رواں ہفتے ضلع بھر کے سبھی حلقوں میں انجام دی جائے۔

ڈپٹی کمشنر نے اعتماد سازی کے اقدامات کو اپنانے پر زور دیا اور کہا کہ ’’عوامی رائے ایک اہم عنصر ہے اور تمام محکمہ جات اس بات کو یقینی بنائیں گے کہ شکایات کا مناسب طریقے سے ازالہ کیا جائے۔‘‘ ڈی سی نے مزید کہا کہ ’’ڈیجیٹل ویک اور بھرشتاچار مکت ہفتہ ہم آہنگ ہیں اور ڈیجیٹل گورننس، کرپشن فری گورننس کی ہی ایک اور صورت ہے، اس طرح تمام خدمات کو PSGA ٹائم لائن کے اندر فراہم کیا جانا چاہئے۔‘‘

افسران پر زور دیتے ہوئے ہوئے ڈی سی نے کہا کہ ’’بدعنوانی کے خلاف زیرو ٹالرنس کو نہ صرف دفاتر میں یقینی بنایا جائے بلکہ تمام افسران کے رابطے کی تفصیلات بھی شیئر کی جائیں تاکہ بدعنوانی کا مکمل خاتمہ ہو اور ضلع پلوامہ کو حقیقی معنوں میں بھرشٹا چار مکت ضلع بنانے کے خواب کو شرمندہ تعبیر کیا جا سکے۔‘‘

قابل ذکر ہے کہ ’’بھرشٹا چار مکت جموں کشمیر‘‘ ہفتہ بھر جاری رہے گا اور اس دوران ضلع بھر میں مختلف مقامات پر تقاریب کا انعقاد کیا جائے گا۔ پروگرام کے پہلے دن ڈپٹی کمشنر نے تمام عہدیداروں کو ہدایت دی کہ وہ اس بات کو یقینی بنائیں کہ نہ صرف سرکاری خدمات کی فراہمی عوام کے لیے آسان بنائی جائے بلکہ آن لائن اور زیر التواء درخواستوں کی فلیگنگ بھی مناسب سطح پر اور مقررہ وقت پر کی جائے۔