کورونا وائرس: سکریننگ کے بغیر بہار کے مزدوروں کا جتھا وادی میں

ترال کے ایک مضافاتی گاؤں املر میں آج اس وقت لوگ پریشان ہوگئے جب ریاست بہار کے مزدوروں کا ایک بڑا گروپ گاؤں میں داخل ہوا۔

کورو نا وائرس کے خطرے کے پیش نظر عوامی حلقوں نے خدشہ ظاہر کیا جا رہا ہے کہ ان مزدوروں کو بغیر اسکریننگ کے ہی بھیج دیا گیا ہے جو اس وقت خطرے سے خالی نہیں ہوگا۔ بہار کے ان مزدوروں کی آمد سے عوام پریشان اور خوف زدہ ہیں۔

ای ٹی وی بھارت کے نمائندے کو فون کر کے ایک مقامی شہری علی محمد نے یہ جانکاری دی۔ بعد ازاں ای ٹی وی بھارت نے یہ معاملہ ایڈیشنل ڈپٹی کمشنر ترال شبیر احمد رینا کی نوٹس میں لایا۔

انہوں نے اعتراف کیا کہ گاؤں میں بہار سے تعلق رکھنے والے مزدوروں کی ایک بڑی تعداد آ گئی ہے۔ انھوں نے مزید کہا کہ مزدوروں کی طبی جانچ کے بعد ہی ان کو کام کرنے کی اجازت دی جائے گی۔