Delay In Assembly Elections in JK مرکز جموں و کشمیر میں اسمبلی انتخابات منعقد کرانے میں غیر سنجیدہ، پی ڈی پی

پی ڈی پی ترجمان ڈاکٹر ہربخش سنگھ نے کہا کہ بدقسمتی سے جموں وکشمیر میں دفعہ 370 کی منسوخی کے بعد اسمبلی انتخابات منعقد نہیں کیے گئے جس کی وجہ سے عوامی سطح پر ایک گھٹن سی محسوس کی جا رہی ہے۔ انہوں نے کہا کہ ایک منتخب عوامی حکومت میں عوام کو سرکار تک زیادہ رسائی حاصل ہوتی ہے جو کہ گورنر راج میں ممکن نہیں ہوتا۔

ترال:مرکز جموں وکشمیر میں اسمبلی انتخابات منعقد کرانے کے لیے سنجیدہ نہیں ہے اور یہی وجہ ہے کہ یہاں ایک عوامی حکومت کا خواب ابھی تک شرمندہ تعبیر نہیں ہوا ہے۔ ان خیالات کا اظہار پی ڈی پی کے ترجمان ڈاکٹر ہربخش سنگھ نے ترال علاقے کا دورہ کرنے کے بعد میڈیا کے ساتھ بات کرتے ہوئے کیا۔ انہوں نے بتایا کہ ایک طرف چیف الیکٹرول افسر جموں وکشمیر میں پنچایتی، بلدیاتی اداروں اور لوک سبھا انتخابات کے انعقاد کے لیے بیانات جاری کر رہا ہے، وہیں اسمبلی انتخابات کے بارے میں مرکز کی معنی خیز خاموشی کئی سوالات کو جنم دے رہی ہے۔

ڈاکٹر ہربخش سنگھ کے مطابق اگرچہ پورے ملک میں پنچایتی راج سسٹم موجود بھی ہے اور وہاں اسمبلی انتخابات بھی وقت پر منعقد کیے جاتے ہیں لیکن بدقسمتی سے جموں وکشمیر میں دفعہ 370 کی منسوخی کے بعد اسمبلی انتخابات منعقد نہیں کیے گئے جس کی وجہ سے عوامی سطح پر ایک گھٹن سی محسوس کی جا رہی ہے، کیونکہ ایک منتخب عوامی حکومت میں عوام کو سرکار تک زیادہ رسائی حاصل ہوتی ہے جو کہ گورنر راج میں ممکن نہیں ہے۔

انہوں نے کہا کہ اس لیے وقت کا تقاضا ہے کہ جموں و کشمیر میں اسمبلی انتخابات منعقد کیے جائیں اور عوام کو اپنی سرکار چننے کا موقع فراہم کیا جائے۔ انہوں نے یہ بات واضح کی مرکز یہاں اسمبلی انتخابات منعقد کرنے میں سنجیدہ نہیں ہے اور یہی وجہ ہے کہ اسمبلی انتخابات کے بارے میں مرکز لب کشائی نہیں کر رہا ہے۔

ڈی ڈی سی ممبر آری پل منظور احمد گنائی کے استعفی کے سوال میں ڈاکٹر ہربخش سنگھ نے کہا کہ ایک منتخب ممبر کا پارٹی سے نکلنا ایک پارٹی کے لیے بہت مشکل ہوتا ہے۔ انہوں نے کہا کہ پارٹیوں کی اپنی آئیڈیالوجی ہوتی ہے اور جو بھی کوئی پارٹی سے نکلتا ہے، پارٹی پھر بھی اس علاقہ میں کام کرتی ہے۔