مقامی سیاسی جماعتوں نے عوام کو گمراہ کیا: بی جے پی

گپکار الائنس کا دکر کرتے ہوئے بی جے پی رہنما نے کہا کہ پارٹی کو کچھ حد تک نقصان ہو سکتا ہے۔ تاہم انہیں کچھ زیادہ فرق نہیں پڑے گا۔

بھارتیہ جنتا پارٹی کے یوتھ ونگ کے لیڈر محمد یعقوب نے آج ای ٹی وی بھارت کے ساتھ بات کرتے ہوئے دعویٰ کیا کہ بی جے پی نے جموں کشمیر میں ترقی کی راہ ہموار کی ہے۔

انہوں نے نیشنل کانفرنس اور پی ڈی پی پر الزام عائد کیا اور کہا کہ 'ان پارٹیوں نے جموں و کشمیر کے لوگوں کے حقوق کو پامال کیا ہے۔ جو کام گذشتہ 70 برسوں میں ان جماعتوں نے نہیں کیا وہ بھارتیہ جنتا پارٹی نے کچھ سالوں میں کر کے دکھایا۔'

محمد یعقوب نے کہا کہ انہوں نے جموں کشمیر میں ہر طرح کی تعمیر و ترقی کا کام کروایا ہے۔ انہوں نے کہا سڑکیں، بجلی اور پانی کے علاوہ ان کے اقتدار میں دیگر ترقیاتی کام شدو مد سے جاری ہے۔گپکار الائنس کا ذکر کرتے ہوئے انہوں نے کہا کہ اس الائنس سے انہیں کچھ حد تک نقصان ہو سکتا ہے۔ تاہم انہیں کچھ زیادہ فرق نہیں پڑے گا۔انہوں نے کہا کہ نیشنل کانفرنس، پی ڈی پی اور کانگریس نے یہاں کے لوگوں کو صرف دھوکہ دیا ہے اور ان کی وجہ سے یہاں اتنے نوجوان بے روزگار ہیں۔ انہوں نے کہا مرکز کی طرف سے جموں کشمیر کے لۓ جو بھی فنڈس واگزار کی جاتی تھی وہ بجائے تعمیر و ترقی کے، لیڈران اپنی جیب میں بھرتے تھے۔