بی جے پی کے سات برس مکمل ہونے پر غریبوں کو امداد

بھارتیہ جنتا پارٹی کی حکومت کو سات برس مکمل ہونے پر پارٹی نے دیگر اضلاع میں پروگرام منعقد کیے اور غریبوں میں کھانے کی اشیاء تقسیم کی۔

بھارتیہ جنتا پارٹی کے سات سال مکمل ہونے پر آج پورے ملک کے ساتھ ساتھ جموں و کشمیر میں بھی بی جے پی کارکنان نے اس لاک ڈاؤن کے پیش نظر غریب عوام میں غذائی اجناس کے ساتھ ساتھ ماسک و سینیٹائزر تقسیم کیے۔

بی جے پی کے کارکنان نے یہ اشیاء ضلع پلوامہ کے راجپورہ، پانپور اور ترال کے غریب عوام میں تقسیم کی۔

فوڈ کٹس و دیگر چیزیں بی جے پی کے ضلع صدر کی نگرانی میں تقسیم کی گئیں۔ اس دوران بی جے پی کے دوسرے کارکنان بھی اس مہم میں شامل رہے۔

اس حوالے سے بی جے پی کے ضلع صدر سجاد رینا نے کہا کہ اس مہم کو آگے بھی جاری رکھا جائے گا۔ انہوں نے کہا کہ یہ اقدام بی جے پی کے سات سال مکمل ہونے کے پیش نظر اٹھایا گیا۔