Awareness Programme for Women: ترال میں مہیلا مورچہ کی جانب سے آگاہی پروگرام

چندری گام، ترال میں منعقدہ آگاہی پروگرام میں مقررین نے خواتین کو حکومت کی جانب سے وضع کی گئی اسکیموں سے استفادہ حاصل کرنے کی اہمیت پر زور دیا۔

پلوامہ (جموں کشمیر) :بھارتیہ جنتاپارٹی (بی جے پی) مہیلا مورچہ کی جانب سے بدھ کو ضلع پلوامہ کے چندری گام، ترال میں آگاہی پروگرام کا اہتمام کیا گیا۔ آگاہی پروگرام میں بی جے پی مہیلا مورچہ عہدیداروں سمیت مقامی خواتین کی ایک بڑی تعداد نے شرکت کی۔ آگاہی پروگرام میں مرکزی سرکار کی مختلف اسکیموں کے بارے میں خواتین کو جانکاری دی گئی جبکہ انہیں مرکزی حکومت کی مختلف اسکیموں کے تعلق سے بھی معلومات فراہم کی گئی۔

آگاہی پروگرام میں مرکزی معاونت والی اسکیموں سمیت جموں و کشمیر حکومت کی جانب سے روزگار بخش اسکیموں سمیت دیگر کئی پروگرامز اور فلاحی اسکیموں کے بارے میں نہ صرف جانکاری دی گئی بلکہ ان اسکیموں سے استفادہ حاصل کرنے کی تلقین کی گئی۔ آگاہی پروگرام کی صدارت بی جے پی مہیلا مورچہ (جموں و کشمیر ونگ) کی نائب صدر ببیتا بھٹ نے سمیت ضلع صدر مہیلا مورچہ دیونندر کور کے علاوہ دیگر کارکنان نے شرکت کی۔

میڈیا نمائندوں کے ساتھ بات کرتے ہوئے ببیتا بھٹ نے بتایا کہ ’’مرکزی سرکار کی جانب سے اگرچہ متعدد اسکیمیں چلائی جا رہی ہیں تاہم بدقسمتی سے ہمارے معاشرے کی خواتین کو ان اسکیموں کے بارے میں جانکاری نہیں ہے اور اسی کے پیش نظر آج اس پروگرام کا اہتمام کیا گیا تھا تاکہ یہ خواتین خودروزگار اسکیموں سے فایدہ اٹھا سکیں۔‘‘

آگاہی پروگرام میں خواتین کو با اختیار بننے پر زور دیا گیا اور حکومتی امداد سے مختلف روزگار بخش یونٹس شروع کرنے کی بھی تلقین کی گئی۔ دریں اثناء، آگاہی پروگرام میں شرکت کر رہی خواتین کو امراض خواتین، شیر خوار بچوں کی صحت سے متعلق بھی آگاہی فراہم کی گئی۔