Arhal Pulwama Macadamisation : پلوامہ میں سڑکوں کی میگڈمائزیشن، عوام میں خوشی

پلوامہ ضلع کے آرہل علاقے میں سڑکوں کی تعمیر و مرمت پر جہاں لوگوں نے انتظامیہ کی ستائش کی وہیں انہوں نے پانی اور بجلی جیسی بنیادی ضروریات کی فراہمی کو بھی یقینی بنائے جانے کی اپیل کی ہے۔ Arhal Pulwama Road Macadamisation

پلوامہ (جموں و کشمیر) :جنوبی کشمیر کے ضلع پلوامہ میں آرہل علاقے کی اندرون سڑکوں کی تعمیر و مرمت اور میگڈمائزیشن کا سلسلہ، موسم میں بہتری کے ساتھ ہی، شروع کر دیا گیا ہے۔ علاقے کی خستہ حال سڑکوں کی مرمت اور میگڈمائزیشن سے عوام میں خوشی کی لہر دوڑ گئی ہے۔ وہیں اس موقع پر مقامی بی ڈی سی چیئرپرسن، لاسی پورہ بلاک، اور بی جے پی لیڈر سجاد رینہ نے بھی علاقے کا دورہ کیا اور میگڈمائزیشن کے کام کا جائزہ لیا۔ انہوں نے اس موقع پر عوامی وفود سے بھی ملاقات کی۔

مقامی باشندوں نے علاقے میں سڑکوں کی میگڈمائزیشن پر حکام کا شکریہ ادا کیا ساتھ ہی انہوں نے لوگوں کو درپیش دیگر مسائل کو حل کرنے کی بھی اپیل کی۔ لوگوں نے علاقے میں پانی، بجلی، طبی سہولیات سمیت دیگر بنیادی ضروریات کے حوالہ سے لوگوں کو درپیش مسائل سے بھی بی ڈی سی چیئرپرسن کو آگاہ کیا۔ رینہ نے عوام کو یقین دہانی کرائی کہ ان کے دیگر مطالبات کو بھی حل کرنے کے لئے ضرورری اقدامات اٹھائے جائیں گے۔

بی ڈی سی چیئرپرسن، لاسی پورہ بلاک، نے میڈیا نمائندوں کے ساتھ بات کرتے ہوئے کہا کہ ’’بی جے پی نے عوامی مفادات کو ہمیشہ ترجیح دی ہے اور بھارتیہ جنتا پارٹی ہمیشہ عوام کو بہتر خدمات فراہم کرنے کی وعدہ بند ہے۔‘‘ انہوں نے دعویٰ کیا کہ شہروں کے ساتھ ساتھ بی جے پی حکومت قصبہ جات اور دیہی علاقوں میں بھی ترقیاتی کام انجام دے رہی ہے جس کی مثال جموں و کشمیر کے ہر کونے میں دیکھنے کو ملے گی۔ واضح رہے کہ وادی کشمیر میں سرما کے اختتام کے ساتھ ہی سڑکوں کی میگڈمائزیشن کا عمل شروع کر دیا جاتا ہے تاہم امسال موسم بہار کے دوران مسلسل بارشوں، ژالہ باری اور درجہ حرارت میں کمی واقع ہونے سے میگڈمائزیشن کا عمل تاخیر سے شروع ہوا۔