Urs in Tral ترال میں حضرت شیخ باقرؒ کا سالانہ عرس منایا گیا

ترال میں بلند پایہ ولی کامل حضرت شیخ باقرؒ کا سالانہ عرس عقیدت و احترام کے ساتھ منایا گیا۔ اس دوران عالمی امن کے لیے خصوصی دعائیں مانگی گئیں۔

ترال: جموں و کشمیر کے صوفی گنڈ ترال میں بلند پایہ ولی کامل حضرت شیخ باقرؒ کا سالانہ عرس عقیدت و احترام کے ساتھ منایا گیا۔ اس دوران عالمی امن کے لیے خصوصی دعائیں مانگی گئیں۔ تفصیلات کے مطابق عرس شیخ باقر رح کے سلسلے میں ان کے آستاں عالیہ واقع صوفی گنڈ میں رات بھر شب خوانی کی گئی، جس میں ترال علاقے کے ساتھ ساتھ دور دراز علاقوں سے آئے ہوئے عقیدت مندوں نے شرکت کی۔

اس موقعے پر درود ازکار اور نعت خوانی کی مجالس منعقد کی گئی۔ اس موقع پر علمائے کرام نے وادی کشمیر میں اولیائے کرام کے پاکیزہ اور متبرک سوانح حیات پر روشنی ڈالتے ہوئے امت مسلمہ پر زور دیا کہ وہ اولیاء کرام کے نقش و قدم پر چلیں۔ اسی میں کامیابی کا راز مضمر ہے۔ انہوں نے شیخ باقر صاحب علہ رحمہ کے مناقب بیان کرتے ہوئے کہا کہ اس بلند پایہ ولی نے اس دور میں کفر شرک کی ظلمت کو دور کرنے کے لیے نہ صرف تبلیغ کی بلکہ شریعت محمدی صلی الله عليه وسلم کی ترویج کے لیے اقدامات اٹھائے۔

وہیں اس دوران عقیدت مندوں کی سہولیات کے لیے ترال انتظامیہ نے موزوں اقدامات کیے تھے۔ اس دوران مقامی ڈی ڈی سی ممبر منظور گنائی نے بھی زیارت عالیہ پر حاضری دی اور زائرین پر زور دیا کہ وہ اس درگاہ کے لازمی سہولیات کے لیے ہر وقت وعدہ بند رہے۔ انہوں نے انتظامیہ کمیٹی اور حکومت کا شکریہ ادا کیا کہ عرس کے موقع پر بہتر اقدامات کیے گیے۔