انتظامیہ اسپتالوں میں آکسیجن اور ویکسین مہیا کرائے: ڈاکٹر ہربخش سنگھ

پی ڈی پی ترجمان اور ڈی ڈی سی ممبر ڈاکٹر ہربخش سنگھ نے ویڈیو جاری کر کے کہا جموں و کشمیر ایل جی انتظامیہ کے بلند بانگ دعوؤں کے باوجود سرکاری اسپتالوں میں آکسیجن اور دیگر لازمی سہولیات نہ ہونے سے عوام کو پریشانیوں کا سامنا کرنا پڑ رہا ہے۔

ویڈیو میں ڈاکٹر ہربخش سنگھ کہتے ہیں کہ عالمی وبا کورونا وائرس کی دوسری لہر سے لڑنے کے لیے انتظامیہ نے معقول انتظامات نہیں کیے ہیں کیونکہ جب بیماروں کو ایک ہسپتال سے دوسرے اسپتال جب منتقل کیا جاتا ہے تو وہاں نہ آکسیجن دستیاب ہوتی ہے اور نہ ہی دوسری لازمی طبی سہولیات اور یہ صورتحال اس وقت پائی جاتی ہے جب جموں کشمیر میں دوسری ریاستوں کے بدلے حالات اطمینان بخش ہیں اور کوئی میڈیکل ایمرجنسی نہیں ہے اور اگر خدانخواستہ صورتحال کو ابھی کنٹرول نہیں کیا گیا تو حالات بگڑ سکتے ہیں۔

سرکاری اسپتالوں میں کووڈ ویکسینز کی عدم دستیابی پر سوال کرتے ہوئے ڈاکٹر ہربخش سنگھ نے بتایا ہے کہ 'ایک جانب لوگوں کو کورونا کی زنجیر توڑنے کے لیے ویکسین لینے کی اپیل کی جاتی ہے تو وہیں جب لوگ لاک ڈاؤن کے باوجود ویکسی نیشن کے لیے اسپتال جاتے ہیں تو وہاں ویکسین ہی نہیں ہوتی، ان حالات میں لوگ کیا کریں گے موصوف نے ایل جی انتظامیہ سے اس ضمن میں فوری اقدامات کرنے کی اپیل کی ہے۔'