پلوامہ میں پہلی خوراک کا 100 فیصد کووڈ ویکسینشن

ضلع پلوامہ میں ویکسنیشن کی پہلی خوراک سو فیصد مکمل ہو گئی ہے۔ اس سلسلے میں آج ضلع انتظامیہ نے ڈی سی کی سربراہی میں ایک تقریب منعقد کی۔

اس موقع پر ضلع ترقیاتی کمشنر پلوامہ نے کہا کہ آج ضلع میں اٹھارہ سال سے اوپر کے تمام لوگوں کو ویکسنیشن کی پہلی خوراک کا ٹارگیٹ مکمل کر لیا گیا ہے۔

انہوں نے کہا کووڈ جیسی مہلک بیماری کے دوران اپنی جان کی پرواہ نہ کرتے ہوئے کام کرنے والے لوگ نہ صرف شاباشی کے مستحق ہے بلکہ یہ قوم کے ہیروز ہیں۔

انہوں نے کہا کہ آج انتظامیہ کی جانب سے یہ جشن والی تقریب ان لوگوں کے لئے منعقد کی جا رہی ہے، جنہوں نے کووڈ جیسی مہلک بیماری پر قابو پانے میں اپنا کلیدی رول ادا کیا ہے۔

کمشنر موصوف نے کہا کہ کووڈ سے لڑتے ہوئے اپنی جان گوانے والے لوگوں کو بھی کبھی نہیں بھولا جا سکتا ہے کیونکہ انہوں نے دوسروں کو زندگی دی۔ انہوں نے کہا کہ ہر اس شخص کو سلام کرتے ہیں، جنہوں نے کووڈ جیسی مہلک بیماری میں انتظامیہ کو تعاون پیش کیا ہے۔

وہیں، اس تقریب میں ضلع پلوامہ کی سی ایم او پلوامہ، میڈیکل سپرنٹنڈنٹ پلوامہ، طبی و نیم طبی عملہ کے علاوہ آشا ورکرز کے ساتھ ساتھ کووڈ 19 ٹیکہ کاری مہم کے دوران کام کرنے والے ملازمین نے بھی شرکت کی۔ اس موقع پر کووڈ 19 وبا کے دوران کام کرنے والے افراد کو اعزاز سے نوازا گیا۔

اس موقع پر ڈی ڈی سی ممبر اور اسٹینڈنگ کمیٹی کے چیئرمین ڈاکٹر ہربخش سنگھ نے میڈیا سے بات کرتے ہوئے کہا کہ ضلع پلوامہ میں 200 بیڈز پر مشتمل کووڈ-19 ہسپتال جلدی ہی عوام کے نام وقف کیا جائے گا۔

انہوں نے مرکزی حکومت سے اپیل کی ہے کہ اس ہسپتال کے لیے طبی اور نیم طبی عملے کی فوری طور پر تقرری عمل میں لائی جائے گی تاکہ ہسپتال بنانے کا مقصد پورا ہو۔

اس موقع پر ضلع ترقیاتی کمشنر پلوامہ بصیر الحق چودھری نے میڈیا سے بات کرتے ہوئے کہا کہ ضلع پلوامہ میں گزشتہ آٹھ مہینوں سے ایک مہم چلائی گئی تھی، جس میں 18 سال سے زائد افراد کی ویکسنیشن کی پہلی خوراک سو فیصد مکمل ہو چکی ہے۔

انہوں نے کہا کہ محمکہ صحت کے سبھی افسران کے ساتھ ساتھ ملازمین نے ٹیکہ کاری مہم کو اچھے سے چلایا۔ ہم ہدف مکمل کرنے میں کامیاب ہوگئے۔

کمشنر نے مزید کہا کہ ضلع میں ویکسنیشن کی پہلی خوراک سو فیصد مکمل ہونے پر انہیں کافی خوشی محسوس ہو رہی ہے۔