پونچھ : منڈی میں سبزی اور پھل فروش انتظامیہ سے سخت ناراض

جموں و کشمیر کے سرحدی ضلع پونچھ میں واقع تحصیل منڈی میں سبزی و پھل فروش انتظامیہ کی جانب سے جاری کردہ ہدایات سے شدید پریشان ہیں۔

اس سلسلے میں سبزی و پھل فروشوں نے انتظامیہ سے سخت ناراضگی کا اظہار کرتے ہوئے کہا کہ ہم لوگ بے روزگار ہیں اور ہمارے پاس ایک یہی ذریعہ ہے جس سے ہم اپنے کنبہ کا پیٹ پالتے ہیں۔ ان کے مطابق انتظامیہ کی جانب سے پہلے 11 بجے دکانیں کھولنے کی اجازت تھی اور اب ترمیم کرکے دوپہر 1 بجے تک دکانیں کھولنے کے احکامات جاری کیے گئے ہیں۔

لیکن سبزیوں کی گاڑیاں 11 بجے منڈی پہنچتی ہیں جس کے بعد سامان لگانے میں 12 بج جاتے ہیں اور جب تک سامان فروخت ہونے لگتا ہے تب تک دکانیں بند کرنے کا وقت ہوجاتا ہے اور ایک بجے کے اندر ہمیں انتظامیہ کے احکامات کے مطابق دکانیں بند کرنی پڑتی ہے جس سے ہمارا کافی نقصان ہوتا ہے۔

ان کا‌ کہنا تھا کہ اگر ہم لوگ دکان نہ کھولیں تو ہمارے بچوں کا پیٹ کون بھرے گا کیا سرکار ہماری معاوِنت کرے گی۔

ان کا انتظامیہ سے مطالبہ ہے کہ سبزی و پھل فروشوں کو مزید وقت دیا جائے تاکہ یہ لوگ نقصانات سے بچ سکیں۔