طرفین کے درمیان فائرنگ کا تبادلہ ایک ایسے وقت میں ہوا جب امریکی صدر ڈونلڈ ٹرمپ نئی دہلی میں اپنا دو روزہ دورہ بھارت سمیٹنے میں مصروف تھے۔
پونچھ میں ایل او سی پر گولہ باری دفاعی ذرائع نے بتایا کہ پاکستانی فوج نے منگل کو دوپہر کے وقت پونچھ کے شاہپور، قصبہ اور کرنی سیکٹروں میں بھارتی فوج کی چوکیوں اور آبادی والے علاقوں کو نشانہ بنا کر ہلکے ہتھیاروں سے فائرنگ کی اور مارٹر گولے داغے۔
انہوں نے کہا کہ بھارتی فوج پاکستان کی بلااشتعال گولہ باری کا موثر اور منہ توڑ جواب دے رہی ہے۔
موصولہ اطلاعات کے مطابق پونچھ میں ایل او سی پر تازہ فائرنگ کے نتیجے میں جہاں نزدیکی علاقوں میں خوف و ہراس کی لہر دوڑ گئی ہے وہیں دو عام شہری زخمی بھی ہوگئے ہیں۔
شاہپور سیکٹر میں چند روز قبل پاکستانی فائرنگ کے نتیجے میں ایک 60 سالہ شخص ہلاک جبکہ تین دیگر زخمی ہوگئے تھے۔ نیز متعدد رہائشی ڈھانچوں کو نقصان پہنچا تھا۔
یہاں یہ امر قابل ذکر ہے کہ بھارت اور پاکستان کے درمیان 1999ء کے تنازعے کے بعد سنہ 2003 میں جنگ بندی کا معاہدہ طے پایا۔ تاہم جنگ بندی کے معاہدے کے باوجود سرحدوں پر فائرنگ کے واقعات پیش آتے رہتے ہیں۔
