ضلع پونچھ کے سیڑھی خواجہ علاقے کی عوام نے پانی کی شدید قلت کو لیکر محکمہ جل شکتی کے خلاف احتجاج کیا۔
پانی کی عدم دستیابی، ضلع پونچھ میں عوام کا احتجاج احتجاج کے دروان علاقے کے مرد و زن نے محکمہ جل شکتی اور ضلع انتظامیہ کے خلاف نعرے بازی کی، احتجاج کر رہے لوگوں کا کہنا ہے کہ کئی ماہ سے ان کے علاقے میں پینے کے پانی کی شدید قلت ہے۔
احتجاج کر رہے لوگوں نے سیڑھی خواجہ تا بنی لیفٹ اسکیم کے تحت انکے علاقے کو بھی پانی مہیا کیے جانے کا مطالبہ کیا۔
مقامی باشندوں کے مطابق بجلی اور سڑک کے حوالے سے وہ پہلے ہی مشکلات سے جوجھ رہے ہیں، تاہم اب پانی کی قلت سے انہیں روزانہ دقتوں کا سامنا کرنا پڑ رہا ہے۔
احتجاج میں شامل خواتین نے بتایا کہ ’’قریب تین 300 گھروں کے لئے ایک ہینڈ پمپ نصب کیا گیا ہے، اور مقامی خواتین کو پانی حاصل کرنے کے لیے گھنٹوں انتظار کرنا پڑتا ہے۔‘‘
انہوں نے دعویٰ کیا کہ ہینڈ پمپ خراب ہونے کے وقت انہیں پینے کا پانی حاصل کرنے کے لیے میلوں کا سفر طے کرنا پڑتا ہے۔
احتجاج کر رہے لوگوں کے مطابق انہوں نے علاقے میں پینے کے پانی کی قلت کے حوالے سے کئی مرتبہ محکمہ جل شکتی سمیت ضلع انتظامیہ کے دفاتر کے چکر کاٹے، تاہم ’’اکیسویں صدی میں بھی سیڑھی خواجہ کی عوام کو پانی جیسی بنیادی سہولیات سے محروم رکھا جا رہا ہے۔‘‘
اس ضمن میں محکمہ جل شکتی کے متعلقہ افسران نے کچھ بھی کہنے سے صاف انکار کر دیا۔
مقامی لوگوں نے متنبہ کیا کہ اگر انکے علاقے میں پانی کی فراہمی کو جلد یقینی نہ بنایا گیا تو وہ احتجاج میں شدت لانے کے لیے مجبور ہو جائیں گے۔
