ضلع پونچھ کے سرحدی علاقہ لائن آف کنٹرول پر بھارت و پاکستان افواج کے درمیان فائرنگ کی اطلاع ہے۔ فائرنگ کی وجہ سے علاقے میں خوف کا ماحول بنا ہوا ہے۔ جبکہ فائرنگ کے دوران پونچھ کے علاقہ مندگار سے تعلق رکھنے والے جہانگیر احد ولد عبدالکریم کے زخمی ہونے کی اطلاع ہے۔ زخمی شخص کو علاج و معالجے کے لیے پونچھ ہسپتال میں داخل کیا گیاہے۔
مقامی لوگوں کا کہنا ہےکہ' آئے روز پاکستان کی جانب سے رہائشی علاقے کو نشانہ بنایا جارہا ہے جس سے ہمیں شدید مشکلات کا سامنا کرنا پڑتا ہے۔'
سماجی کارکن چودھری تنویر نےکہا کہ آئے روز سرحد پر ہونے والی فائرنگ سے ہمیں شدید مشکلات کا سامنا ہے۔ لیکن انتظامیہ کی اس طرف کوئی بھی توجہ نہیں ہے۔ انہوں نے لیفنینٹ گورنر جموں و کشمیر و مرکزی حکومت سے مطالبہ کیا کہ اس قسم کی فائرنگ کے خاتمہ کے لیے اقدامات کیا جائے اور یہاں کی عوام کو امن فراہم کیا جائے'۔
انہوں نے کہا کہ دہائیوں سے سرحد پر رہنے والوں کو پریشانی کا سامنا ہے لیکن اس جانب کوئی بھی توجہ نہیں دے رہا ہے۔ انہوں نے کہا کہ مرکزی حکومت کو چاہیے کہ اس سرحدی کشیدگی کا خاتمہ کرکے یہاں کی عوام کو امن کا ماحول فراہم کرے۔ انہوں نے مزید کہا کہ ان سرحدی علاقاجات میں بنکروں کی تعمیر کو بھی جلد از جلد مکمل کیا جائے تاکہ لوگ خوف کی اس زندگی سے کم از کم راحت حاصل کرسکیں۔