پونچھ: درندازی کی کوشش ناکام، ایک عسکریت پسند ہلاک

فوجی ترجمان نے کہا کہ 'جائے وقوع سے برآمد کی گئی کھانے پینے کی چیزوں پر پاکستان کی کمپنیوں کے نشان ہے جس سے معلوم ہوتا ہے کہ پاکستان عسکریت پسندوں کی سرپرستی کر رہا ہے'۔

فوج نے اتوار کے روز بتایا کہ جموں و کشمیر کے ضلع پونچھ میں لائن آف کنٹرول (ایل او سی) کے ساتھ دراندازی کی کوشش ناکام بناتے ہوئے ایک عسکریت پسند ہلاک اور دو دیگر شدید زخمی ہوگئے۔

فوجی ترجمان جموں نے ایک پریس بیان میں کہا کہ 07 اگست 2020 کو عسکریت پسندوں کا ایک گروپ ضلع پونچھ کے کرشنا گھاٹی سیکٹر میں کنٹرول لائن کے پار سے بھارتی علاقہ میں داخل ہونے کی کوشش کر رہا تھا۔ تاہم سرحد پر تعینات فوجی جوانوں نے عسکریت پسندوں کی کوشش کو ناکام بنا دیا۔ جس کے نتیجے میں ایک عسکریت پسند موقع پر ہی ہلاک اور دوسرے دو زخمی ہوئے۔اس کے بعد علاقے میں تلاشی مہم شروع کی گئی جس سے معلوم ہوا کہ عسکریت پسند لاش کو گھسیٹ کر لے گئے ہیں۔ تاہم جائے وقوعہ کی جگہ سے ایک اے کے 47 رائفل، دو اے کے 47 میگزین اور کچھ کھانے پینے کی اشیاء برآمد ہوئی ہیں۔

انہوں نے بتایا کھانے پینے کی چیزوں پر پاکستان کی کمپنیوں کے نشان ہے جس سے معلوم ہوتا ہے کہ پاکستان عسکریت پسندوں کی سرپرستی کر رہا ہے۔

فوجی ترجمان نے کہا "سیکیورٹی فورسز پاکستان کی جانب سے کسی بھی طرح کے مذموم حرکت کو ناکام بنانے اور کنٹرول لائن کے ساتھ ساتھ انسداد دراندازی کا ایک مضبوط گرڈ برقرار رکھے ہوئے ہیں۔"