Body of Newborn Found in Mandi منڈی میں نوزائدہ کی لاش بر آمد

منڈی علاقے میں دریا سے نوزائدہ کی لاش برآمد ہونے کے واقعے پر حیرت اور افسوس کا اظہار کرتے ہوئے مقامی باشندوں نے معاملہ کی باریک بینی سے تحقیقات کرکے ملوث افراد کے خلاف قانونی کارروائی عمل میں لائے جانے کا مطالبہ کیا ہے۔

پونچھ (جموں و کشمیر) :سرحدی ضلع پونچھ کے تحصیل منڈی میں ایک دریا سے نوزائدہ کی لاش برآمد ہوئی۔ مقامی باشندوں نے اسے ’’افسوس کن‘‘ قرار دیتے ہوئے پونچھ پولیس سے تحقیقات کا مطالبہ کرتے ہوئے ملوث افراد کے خلاف قانونی کارروائی عمل میں لائے جانے کا مطالبہ کیا ہے۔ تاکہ ’’مستقبل میں اس طرح واقعات رونما نہ ہوں۔‘‘

مقامی باشندوں کا کہنا ہے کہ منڈی پل کے نزدیک دریا میں مقامی باشندوں نے ایک بچے کی لاش دیکھی جس کے بعد انہوں نے فوری طور آس پاس کے باشندوں اور پولیس کو مطلع کیا۔ پولیس اور مقامی رضاکاروں نے نوزائدہ کی بازیاب کر کے اسے سب ضلع اسپتال، منڈی پہنچایا۔ اسپتال انتظامیہ نے واقعے کی تصدیق کرتے ہوئے کہا کہ اسپتال پہنچانے پوسٹ مارٹم سمیت دیگر طبی لوازمات کی تکمیل کے بعد نوزائدہ کی لاش کو پولیس کے سپرد کر دیا گیا۔ انہوں نے کہا کہ طبی معائنے کے دوران معلوم ہوا کہ لاش بوسیدہ ہو چکی ہے، غالب گمان ہے کہ بچہ کئی روز قبل فوت ہو چکا ہے۔

پونچھ پولیس نے اس حوالے سے پولیس اسٹیشن منڈی میں ایک ایف آئی آر زیر نمبر 20/2023 u/s 318/IPC درج کرکے مزید تحقیقات شروع کر دی ہے۔ پولیس کا کہنا ہے کہ بچے کی شناخت کے حوالہ سے کوششیں جاری ہیں۔ ادھر، مقامی باشندوں نے انتظامیہ سے اپیل کی ہے کہ اس معاملے کی باریک بینی کے ساتھ تحقیقات کی جائے اور ایسی مجرمانہ حرکت انجام دینے والے افراد کے حلاف سخت کارروائی عمل میں لائی جائے تاکہ مستقبل میں اس طرح کے معاملات پیش نہ آئیں۔ مقامی باشندوں کا کہنا ہے کہ علاقے میں گزشتہ دنوں اسی طرح کا ایک واقعہ پیش آیا ہے۔