پونچھ: جھولہ پل کی خستہ حالی سے لوہیل بیلہ کی عوام پریشان

تحصیل منڈی کے لوہیل بیلہ علاقے کی عوام جھولہ پل کی خستہ حالی کی وجہ سے پریشان ہے، سبکدوش اے ایس آئی محمد شفیع میر اور مقامی باشندوں نے ضلع انتظامیہ کے ساتھ ساتھ لیفٹیننٹ گورنر سے پل کی از سرِنو مرمت کرانے کی اپیل کی ہے۔

جموں و کشمیر، ضلع پونچھ کی تحصیل منڈی کے لوہیل بیلہ علاقے کی عوام لورن سے آنے والے نالے پر تعمیر جھولہ پل کی خستہ حالی کی وجہ سے کافی زیادہ پریشان ہے، جس کی مرمت کے لیے علاقے کے لوگوں نے ضلع انتظامیہ سے اپیل بھی کی ہے۔

سبکدوش اے ایس آئی محمد شفیع میر نے کہا کہ جھولہ پل سے لوہیل بیلہ، بیلہ سیٹھی، سٹیلاں اور ناگاناڑی وغیرہ علاقوں کی عوام گزرتی ہے، لیکن اس پل کی مرمت نہ ہونے سے پل کے دیگر سازوسامان کے علاوہ رسیاں بھی بوسیدہ ہوگئی ہیں، جس کی وجہ سے پل کے منہدم ہونے کا خطرہ ہر وقت بنا رہتا ہے اور موسم سرما میں برف گرنے سے اس پل پر عوام کا چلنا بھی دشوارکن ہوتا ہے۔

انہوں نے ضلع انتظامیہ کے ساتھ ساتھ لیفٹیننٹ گورنر سے بھی اپیل کی ہے کہ وہ جہاں باقی علاقوں میں سڑکیں اور پل تعمیر کروا رہے ہیں وہیں اس لوہیل بیلہ کی غریب عوام کے ساتھ اس جھولہ پل کی از سرِنو تعمیر کراکے انصاف کیا جائے۔

اس موقع پر سبکدوش اے ایس آئی محمد شفیع میر کے ساتھ محمد شوکت کھاری، اخترعباس، محمد رشید، محمد دین، مشتاق احمد، محمد حفیظ اور محمد اعظم وغیرہ بھی موجود رہے۔