Poonch militant attack پونچھ میں فوجی ٹرک پر حملہ،عسکریت پسند فوجیوں کی رائفلیں چھین کر فرار

گزشتہ روز جموں و کشمیر کے ضلع پونچھ میں عسکریت پسندوں کی جانب سے فوجی گاڑیوں پر حملہ کیا گیا،اس حملہ میں پانچ فوجیوں کی موت ہوئی تھی۔

پونچھ: 20 اپریل کو پونچھ ضلع کے بھٹادھولیاں علاقے میں نامعلوم عسکریت پسندوں نے فوج کی گاڑی پر حملہ کر کے پانچ فوجیوں کو ہلاک کر دیا تھا۔ اس دوران عسکریت پسند اپنے ساتھ دو فوجی جوانوں کی رائفلیں بھی لے گئے، جبکہ آگ لگنے سے چار جوانوں کی رائفلیں جل کر راکھ ہو گئیں۔

عسکریت پسندوں نے یہ پورا حملہ دو سے تین منٹ تک کیا جس میں اسّی سے زائد گولیاں چلیں، 52 گولیاں فوجی گاڑی کو لگیں۔ جو زیادہ تر اسٹیل کی گولی تھی۔ ذرائع کے مطابق جب عسکریت پسندوں نے فوج کی گاڑی پر حملہ کیا، اس وقت فوج کی گاڑی میں چار جوان پیچھے بیٹھے تھے اور ڈرائیور کے ساتھ ایک اور جوان سامنے بیٹھا تھا۔

حملے کے دوران عسکریت پسندوں نے فوجی گاڑی کو آگ لگا دی تھی، جس کے باعث پیچھے بیٹھے فوجیوں کے ہتھیار بھی جل کر راکھ ہو گئے جبکہ ڈرائیور اور سامنے بیٹھے دیگر فوجیوں کے ہتھیار محفوظ رہے۔ حملے کے بعد فرار ہوتے ہوئے عسکریت پسند دونوں فوجیوں کے ہتھیار بھی اپنے ساتھ لے گئے۔

ذرائع کا کہنا ہے کہ اس حملے کے دوران عسکریت پسندوں نے اسی سے زائد گولیاں چلائیں جن میں سے 52 گولیاں فوجی گاڑی کو لگیں۔ جن میں سے زیادہ تر اسٹیل کی گولیاں تھی اور وہ بھی چائنہ میں بنی ہوئی تھیں، جن پر چینی زبان میں بھی کچھ لکھا ہوا تھا ۔

سیکیورٹی اداروں نے کئی گولیاں بھی قبضے میں لے لی ہیں۔ دو تین منٹ میں بیک وقت اتنی گولیاں برسانا اس بات کا ثبوت ہے کہ حملہ کرنے والے عسکریت پسندوں کے پاس گولہ بارود کی کوئی کمی نہیں تھی اور یہ کام چھ سات عسکریت پسند کر سکتے ہیں۔