پونچھ: غریب خاندان پردھان منتری آواس یوجنا اسکیم سے محروم

جموں و کشمیر کے ضلع پونچھ کے تحصیل منڈی میں ایک خاندان سرکاری اسکیم سے آج بھی محروم ہے۔ کسمپرسی کے شکار اس کنبے نے سرکاری افسران اور دفاتر کے متعدد چکر لگائے لیکن انہیں پردھان منتری آواس یوجنا کا فائدہ نہیں مل سکا ہے۔

حکومت دعوی کرتی ہے کہ سبھی ضرورت مندوں کو آواس یوجنا کے تحت پکا مکان مل رہا ہے۔ لیکن حکومت کا یہ دعوی محض کاغز تک کی محدود ہے۔

ضلع پونچھ کے تحصیل منڈی کے گاؤں اڑی میں ایک غریب خاندان کچے مکان میں رہنے کو مجبور ہے۔یہ کنبہ آج بھی اپنے کچے اور خستہ حال مکان میں رہنے کو مجبور ہے اور پردھان منتری آواس یوجنا اسکیم کی سہولیات سے محروم ہے۔

گھر کے مالک محمد ایوب کے مطابق وہ برسوں سے کچے مکان میں رہتے ہیں۔ انہیں اب تک کوئی سہولت نہیں ملی ہے۔ بارش ہونے پر مکان کے اندر پانی بھر جاتا ہے جس کے بعد بیٹھنے کی بھی جگہ نہیں ہوتی۔ انہوں نے بتایا کہ انہیں پردھان منتری آواس یوجنا کے تحت آشیانہ نہیں مل سکا۔

ایوب کی اہلیہ حنیفہ کا کہنا ہے کہ ان کے خاندان میں آٹھ افراد ہیں ان کی ایک بچی معذور ہے، وہ چلنے پھرنے سے قاصر ہے۔ غربت کی وجہ سے اس کا علاج و معالجہ بھی نہیں ہو پا رہا ہے وہ بھیک مانگ کر اپنا گزارا کرتے ہیں۔'

واضح رہے کہ ایسے کئی خاندان ہیں جو اس اسکیم سے محروم ہیں۔ انہوں نے انتظامیہ سے اپیل کی ہے کہ جلد سے جلد پردھان منتری آواس یوجنا کے تحت مکان فراہم کیا جائے تاکہ دیگر شہریوں کی طرح وہ بھی مناسب طریقے سے زندگی گزر بسر کر سکیں۔