کانگریس کے سابق صدر راہل گاندھی اور پارٹی کی سکریٹری جنرل پرینکا گاندھی وڈرا پر اترپردیش کے ہاتھرس میں ایک متاثرہ لڑکی کے اہل خانہ سے ملنے جانے کے دوران ہوئے مبینہ حملے کے سلسلے میں اڈیشہ اسمبلی میں سنیچر کو زبردست ہنگامہ ہوا جس کی وجہ سے ایوان کی کارروائی تین مرتبہ ملتوی کرنی پڑی۔
وقفہ صفر کے دوران کانگریس لیجس لیٹر کونسل کے لیڈر نرسنگھ مشرا نے یہ معاملے اٹھاتے ہوئے کہا 'اترپردیش کی پولس نے نہ صرف مسٹر راہل گاندھی اور محترمہ پرینکا وڈرا کو ہاتھرس جانے سے روکا بلکہ انہیں حراست میں لیا، ان کی پٹائی کی اور انہیں گرفتار بھی کیا'۔
مسٹر مشرا کی اپنی بات ختم کرتے ہی کانگریس کے سبھی اراکین اسمبلی کے وسط میں آگئے اور نعرے بازے شروع کردی اور ایوان کی کارروائی میں رکاوٹ ڈالی۔ کانگریس کے اراکین وزیراعظم نریندر مودی اور اترپردیش کے وزیراعلی یوگی آدتیہ ناتھ کے خلاف نعرے لگارہے تھے۔
یہ بھی پڑھیے
راہل اور پرینکا گاندھی کو ہاتھرس متاثرہ خاندان سے ملاقات کی اجازت
ہاتھرس کی ایک دلت لڑکی کی کچھ لوگوں نے 14 ستمبر کو آبروریزی کی اور اسے بری طرح سے زخمی کردیا تھا۔ بعد میں دہلی کے ایک اسپتال میں گزشتہ منگل کو متاثرہ کی موت ہوگئی۔ پولس انتظامیہ نے عجلت میں اس کی لاش کو جلادیا۔
