مالیگاؤں میں نوجوان کسان نے خودکشی کی

مسلم اکثریتی شہر مالیگاؤں سے تقریباً 25 کلومیٹر کی دوری پر واقع نانگاؤں تعلعقہ میں ایک نوجوان کسان نے 40 فٹ گہرے کنویں میں کود کر خودکشی کرلی۔

ریاست مہاراشٹر کے مسلم اکثریتی شہر مالیگاؤں سے تقریباً 20 تا 25 کلومیٹر کی دوری پر واقع نان گاؤں تعلقہ کے آسنت دیہات میں ایک 26 سالہ نوجوان سچن سریش نے سرکاری ملازمت نہ ملنے کے سبب کنویں میں کود کر خودکشی کرلی۔

اطلاع کے مطابق یہ نوجوان گریجویٹ تھا اور گزشتہ کئی مہینوں سے سرکاری ملازمت کی تلاش میں تھا لیکن کئی ماہ گزر جانے کے بعد بھی ملازمت نہ ملنے پر نوجوان نے مایوس ہوکر دیر رات دیہات کے قریب واقع ایک کھیت کے کنویں کود کر اپنی جان دے دی۔

تفصیلات کے مطابق مقامی غوطہ خور اور منماڑ فائر بریگیڈ عملہ کی لاکھ کوششوں کے بعد بھی نوجوان کی لاش نہیں مل سکی۔

لاش نہ ملنے کی صورت میں منماڑ فائر بریگیڈ اور پولس افسران کے اصرار پر مالیگاؤں فائر بریگیڈ محکمہ کے انچارج سنجے پوار نے ماہر تیراک شکیل تیراک کو جائے واقعہ پر روانہ کیا۔

شکیل تیراک چھٹی ہونے کے باوجود اپنی موٹر سائیکل سے آسنت دیہات روانہ ہوگئے اور دیہات میں پہنچنے کے بعد انھوں نے کنویں کے پانی کا جائرہ لیا جس کے بعد تقریباً آدھے گھنٹے کی مشقت کے بعد لاش کو پانی سے نکالنے میں کامیابی حاصل کرلی گئی۔

شکیل تیراک کے مطابق لاش تقریب 40 تا 45 فٹ گہرے پانی میں جاکر نیچے جھاڑیوں میں پھنس گئی تھی اس لیے لاش تلاشنے میں دشواری پیش آرہی تھی۔

فی الحال تمام قانونی مراحل کے بعد لاش کو اہل خانہ کے حوالے کردیا گیا ہے۔