آبی آلودگی سے مقامی باشندے پریشان

میونسپل کارپوریشن کی کوتاہی سے اورنگ آباد شہر کے قلب میں واقع سوت گیرنی گراؤنڈ ان دنوں عارضی تالاب میں تبدیل ہوگیا ہے، جہاں ڈرینج کی غلاظت جمع ہونے سے اطراف کی بستیوں میں وبائی امراض پھیلنے کا اندیشہ ہے۔

ریاست مہاراسٹر کے اورنگ آباد شہر کے قلب میں واقع سوت گیرنی گراؤنڈ ان دنوں عارضی تالاب میں تبدیل ہوچکا ہے، جہاں ڈرینج کی غلاظت جمع ہونے سے اطراف کی بستیوں میں وبائی امراض پھیلنے کا اندیشہ ہے، مقامی لوگوں کی شکایت کے باوجود کارپوریشن کی جانب سے اس مسئلے کا حل نہیں نکالا جارہا ہے۔ اس کے وجہ سے مقامی لوگ اب غلاظت میں جینے کو مجبور ہیں۔

وہیں سوت گیرنی گراؤنڈ سے لگ کر ہی میونسپل کارپوریشن کا میٹرنیٹی اسپتال بھی ہے، اس اسپتال کا عملہ اور مریض بھی بدبو سے پریشان ہیں۔ مقامی لوگوں کا کہنا ہیکہ دو مہینے سے باضابطہ شکایتیں کیں جارہی ہیں لیکن کارپوریشن حکام نے آج تک اس مسئلے کا حل نہیں نکالا گیا ۔

وہیں کچھ لوگوں کا کہنا ہے کہ کارپوریشن نے ڈرینج کی غلاظت کو بارش کے نالے میں ملادیا جس سے مسئلہ حل تو نہیں ہوا بلکہ نالے کے ذریعے اب تمام بستیوں میں بدبو پھیل رہی ہے غیر محفوظ نالا بھی مکینوں کے لیے مصیبت کا سبب بنا ہوا ہے ۔

اورنگ آباد شہر سے کورونا وبا کا ابھی پوری طرح سے خاتمہ بھی نہیں ہوپایا ہے، جبکہ دوسری وبا آنے کا خدشہ بڑگ گیا ہے، سرکاری حکام کا کہنا ہیکہ صاف صفائی اور احتیاط کے ذریعے ہی وبائی امراض پر قابو پایا جاسکتا ہے لیکن اورنگ آباد میونسپل کارپوریشن صحت عامہ اور صفائی کے معاملے میں کتنا سنجیدہ ہے سوت گیرنی گراؤنڈ کی غلاظت سے ہی اس کا اندازہ لگایا جاسکتا ہے۔