سی اے اے کے خلاف ونچت بہوجن اگھاڑی کی جانب سے مہاراشٹر بند کا اعلان

پرکاش امبیڈکر کی قیادت والی ونچت بہوجن اگھاڑی (وی بی اے) نے 24 جنوری کو مہاراشٹر بند کا اعلان کیا ہے جس کی 50 سے زائد تنظیموں نے حمایت کی ہے۔

ونچت بہوجن اگھاڑی کی مہاراشٹر یونٹ کے ترجمان سدھارتھ موكالے نے کہا کہ بند کا اعلان سی اے اے، این آر سی اور ملک کی اقتصادی بدحالی کے لیے مرکزی حکومت کی غلط پالیسیوں کے خلاف کیا گیا ہے۔

انہوں نے کہا کہ مرکزی حکومت سی اے اے کو زبردستی نافذ کرنا چاہتی ہے۔

سدھارتھ موکالے نے کہا کہ 'نوٹ بندی اور جی ایس ٹی کی وجہ سے ملک معاشی طور دیوالیہ ہونے کی دہلیز پر ہے اس کی وجہ مرکزی حکومت کی غلط اقتصادی پالیسیاں ہیں۔

ونچت بہوجن اگھاڑی نے ہم خیال سیاسی جماعتوں سے بھی بند میں شامل ہونے کی اپیل کی ہے۔

انہوں نے کہا کہ بند مکمل طور پر امن طریقے سے کیا جائے گا اور کسی کو بھی زبردستی اس میں شامل نہیں کیا جائے گا۔

اس دوران پرکاش امبیڈکر نے وزیراعلی ادھو ٹھاکرے سے ملاقات کرکے بند کے سلسلے میں اطلاع دی۔