ممبئی کے مسجد اور بائیکلہ ریلوے اسٹیشن کے درمیان پٹریوں پر پانی جمع ہو جانے سے دو لوکل ٹرینیں پھنس گئیں جس کے بعد نیشنل ڈیزاسٹر رسپانس فورس نے ان ٹرینوں میں پھنسے 55 مسافروں کو بحفاظت نکالا۔
این ڈی آر ایف کے ڈائریکٹر جنرل ستیا پردھان نے بتایا کہ 'نیشنل ڈیزاسٹر رسپانس فورس نے ان ٹرینوں میں پھنسے ہوئے تمام 55 مسافروں کو بحفاظت نکال لیا۔'
قبل ازیں ریلوے اسٹاف نے سی ایس ٹی سے کرجت جانے والی لوکل ٹرین میں پھنسے 150 مسافروں کو بحفاظت نکالا۔
این ڈی آر ایف کے مطابق کرجت سے سی ایس ٹی کی طرف جانے والے ایک اور ٹرین مسجد اسٹیشن سے 60 میٹر کے فاصلے پر پھنس گئی جس میں سے کشتی کی مدد سے 40 افراد کو بچایا گیا۔
ریاست مہاراشٹر کے وزیراعلیٰ ادھو ٹھاکرے نے ریاستی دارالحکومت ممبئی میں جاری موسلادھار بارش سے رونما ہونے والے حالات کا جائزہ لیا اور محکمہ موسمیات کی ہدایت کے مطابق متعلقہ محکموں کو الرٹ رہنے کو کہا۔
محکمہ موسمیات نے جمعرات کے روز بھی شہر و مضافات میں موسلادھار بارش ہونے کی پیش گوئی کی ہے۔
وزیراعلیٰ ادھو ٹھاکرے نے رتناگیری، سندھودرگ، پالگھر، کولہاپور، تھانے اور رائے گڑھ کے ڈسٹرکٹ کلکٹرز کے ساتھ موسلادھار بارش کے سبب پیدا ہونے والی صورتحال کا بھی جائزہ لیا۔
