لوکل ٹرینوں پر پتھر مارنے کے واقعات میں اضافہ

ریاست مہاراشٹر کے دارالحکومت ممبئی کی لوکل ٹرینوں میں آئے روز پتھر مارنے کے واقعات پیش آ رہے ہیں جس میں مسافر بھی زخمی ہو رہے ہیں۔

ممبئی کی لائف لائن کہی جانے والی لوکل ٹرینوں میں گذشتہ 6 برسوں میں پتھر پھینکنے کے 118 واقعات پیش آئے ہیں جبکہ ان واقعات میں 113 لوگ زخمی ہوئے ہیں۔

یہ تمام معلومات آر ٹی آئی (حق معلومات) قانون کے تحت حاصل کی گئی ہے۔

حیرت کی بات یہ ہے کہ اتنی بڑی تعداد میں اس طرح کے واقعات رونما ہونے اور مسافروں کے زخمی ہونے کے باوجود ریلوے پولیس نے اب تک محض 21 معاملے ہی حل کرنے میں کامیابی حاصل کی ہے جبکہ ان واقعات میں 20 ملزمین کو گرفتار کیا گیا ہے۔

حق معلومات سے اس بات کا بھی انکشاف ہوا ہے کہ سینٹرل لائن میں چلنے والی لوکل ٹرین سی ایس ٹی سے کرجت میں سب سے زیادہ پتھر بازی کے واقعات پیش آئے ہیں۔

حق معلومات سے حاصل کی گئی تفصیلات کے مطابق گذشتہ 6 برسوں میں پتھر پھینکنے کے 87 واقعات پیش آئے ہیں جبکہ ان واقعات میں 81 مسافر زخمی ہوئے ہیں، اسی طرح ہاربر لائن پر 21 واقعات میں 18 مسافر زخمی ہوئے ہیں۔

ان واقعات کو دیکھتے ہوئے سنہ 2005 میں بامبے ہائی کورٹ نے ریلوے پٹری کے اطراف دیوار بنانے کا حکم دیا تھا لیکن کورٹ کے اس حکم کے باوجود اسے عملی جامہ پہنانے میں محکمہ ریلوے ناکام رہا اور نتیجہ یہ ہوا کی پتھر بازی کے واقعات میں بجائے کمی ہونے کے اس میں اضافہ ہوتا نظر آیا۔

حالیہ دنوں میں محکمہ ریلوے نے پتھر بازی کے معاملے میں کارروائی مہم شروع کی تھی لیکن حق معلومات کے ذریعے حاصل ہونے والی دستاویزات کو دیکھ کر یہ بات واضح ہوگئی ہے کہ پتھر بازوں پر پولیس کارروائی مہم کا کوئی خاص اثر نہیں ہوا جس کی وجہ سے آج بھی ملزمین پولیس کی گرفت سے باہر ہیں۔