سی بی آئی نے مہاراشٹر کے سابق وزیر داخلہ انیل دیش مکھ کے خلاف غیر قانونی وصولی کے الزام میں مقدمہ درج کیا ہے اور ہفتہ کی صبح ان کے گھر پر سی بی آئی نے چھاپہ مارا۔
تفتیشی ایجنسی نے ممبئی کے سابق اعلیٰ پولیس افسر پرمبیر سنگھ کے ذریعہ لگائے گئے بدعنوانی کے الزامات سے متعلق ایک مقدمہ درج کیا ہے۔
واضح رہے کہ پرمبیر سنگھ سابق کمشنر نے انل دیشمکھ کے خلاف بدعنوانی کی تفتیش سی بی آئی سے کروانے اور اپنے تبادلے پر روک لگانے کے مطالبے پر سپریم کورٹ کا دروازہ کھٹکھٹایا تھا۔
ملک کے بڑے صنعت کار مکیش امبانی کے گھر ’اینٹیلیا‘ کے سامنے جیلیٹن چھڑوں سے لیس گاڑی برآمد کیے جانے کے پیش نظر کمشنر کے عہدے سے ہٹائے گئے مسٹر سنگھ نے اپنے تبادلے کو بھی چیلنج کیا تھا۔
عرضی گزار نے کہا تھا کہ مسٹر دیشمکھ اپنی رہائش گاہ پر فروری 2021 میں ممبئی جرائم کی خفیہ یونٹ کے سچن وازے اور ممبئی کے سوشل سروس برانچ کے ایس پی سنجے پاٹل سمیت مختلف پولیس افسران سے ملے تھے اور انھیں 100 کروڑ روپے کی وصولی کرنے کی ہدایت دی تھی۔ ان افسران سے کہا گیا تھا کہ وہ مختلف اداروں اور دیگر ذرائع سے وصولی کریں۔
مسٹر سنگھ نے اپنی عرضی میں کہا تھا کہ مسٹر دیش مکھ کے گھر میں لگے سی سی ٹی وی کو قبضے میں لیا جانا چاہیے اور اس کی چھان بین کی جانی چاہیے تاکہ ان کے یہاں آنے جانے والے افسران کی فہرست تیار کی جا سکے۔
