ممبئی:شیوسینا ادھو بالا صاحب ٹھاکرے گروپ کے رکن پارلیمان و ترجمان سنجے راوت کو لارینس بشنوئی گروہ کے نام سے جان سے مارنے کی دھمکی ملی ہے۔ پارٹی کے عہدیداروں کے مطابق سنجے راوت کو جمعہ کو دیر رات اپنے موبائل فون پر دھمکی کے حوالے سے ایک واٹس اپ میسیج موصول ہوا۔ میسیج میں متنبہ کیا گیا کہ سنجے راوت جب بھی دہلی میں دیکھائی دیں گے، انہیں اے کے 47 رائفل سے گولی ماردی جائے گی۔ راوت نے ممبئی پولیس کمشنر کو اس کی اطلاع دے دی ہے۔ پولیس اس معاملے میں جانچ کررہی ہے۔
انھوں نے مزید بتایا کہ جو میسیج موصول ہوا ہے اس میں لکھا ہے کہ 'تیرا بھی موسے والا کی طرح حال کروں گا' میسیج میں مزید لکھا ہے کہ 'سلمان خان اور تو فکس' اس سے قبل مہاراشٹر کے نائب وزیر اعلی دیویندر فڑنویس کو بھی جان سے مارنے کی دھمکی دی تھی۔ ہفتے کو شیوسینا (یوٹی بی) کے قائد حزب اختلاف(کونسل) امباداس دانوے نے کہا کہ موجودہ ریاستی حکومت نے راوت کی سیکورٹی ہٹا دی ہے۔ انہوں نے زور دیا کہ دھمکیوں کو سنجیدگی سے لیا جانا چاہیے۔ قابل ذکر ہے کہ بالی ووڈ سپر اسٹار سلمان خان کو بھی حال ہی میں لارنس بشنوئی گینگ یا اس کے ساتھیوں کی جانب سے جان سے مارنے کی دھمکیاں موصول ہوئی تھیں۔