مہاراشٹر: ارکان اسمبلی کوعہد دلایا گیا

ریاست مہاراشٹر میں سیاسی ڈرامے بازی کے دوران شیوسینا، این سی پی اور کانگریس نے ہوٹل گرینڈ حیات میں منعقد گیٹ ٹو گیدر پروگرام میں اپنے تمام ارکان اسمبلی کو پارٹی کے ساتھ ایماندار رہنے کا عہد دلایا۔

مہاراشٹر کے دارالحکومت ممبئی میں واقع ہوٹل گرینڈ حیات میں تینوں پارٹیوں(شیوسینا، این سی پی، کانگریس) نے اپنے اپنے ارکان اسمبلی کو میڈیا کے روبرو کروا کے وضاحت کی کہ اس کے ارکان اسمبلی بی جے پی کے ساتھ نہیں بلکہ اپنی پارٹی کے ساتھ ہیں۔

اس پروگرام میں این سی پی کے سربراہ شرد پوار، جتیندر اوہاڑ ، شیوسینا کے سربراہ ادھو ٹھاکرے، سنجے راؤت، کانگریس کے بالا صاحب تھورات، اشوک چوہان کے ساتھ 162 ارکان اسمبلی موجود تھے۔

یہاں پر تمام ارکان اسمبلی کو عہد دلایا گیا کہ ' ہم قسم کھاتے ہیں کہ ہم شرد پوار، سونیا گاندھی اور ادھو ٹھاکرے کی قیادت میں کام کریں گے اور پارٹی کے ساتھ ایماندار رہیں گے۔'

واضح رہے کہ گزشتہ روز این سی پی کے سینیئر رہنما اجیت پوار نے پارٹی سربراہ کو اطلاع دیے بغیر بھارتیہ جنتا پارٹی کے ساتھ مل کر حکومت بنا لی اور نائب وزیراعلی کے عہدے کا حلف لے لیا۔

اجیت پوار کے اس اقدام کی وجہ سے ریاست میں سیاسی طوفان برپا ہوگیا تھا۔

حالاںکہ شرد پوار نے کہا کہ بی جے پی کی حمایت کرنا اجیت پوار کا ذاتی فیصلہ ہے اس سے پارٹی کا کوئی تعلق نہیں۔