'ہم پانچ نہیں پچاس برس کے لیے آئے ہیں'

ریاست مہاراشٹر کے دارالحکومت ممبئی میں واقع ہوٹل گرینڈ حیات میں ارکان اسمبلی کی پریڈ کے دوران شیوسینا کے سربراہ ادھو ٹھاکرے نے کہا کہ 'شیوسینا، این سی پی اور کانگریس کے 162 اراکین اسمبلی یہاں موجود ہیں اور ہم اب بتائیں گے کہ شیوسینا کیا چیز ہے۔'

ریاست مہاراشٹر میں جاری سیاسی بحران کے درمیان شیوسینا، این سی پی اور کانگریس نے اپنے اپنے ارکان اسمبلی کو ہوٹل حیات میں یکجا کر کے واضح کیا کہ ان کے پاس اکثریت ہے اور وہ حکومت سازی کے اہل ہیں۔

بشکریہ ٹویٹر

شیوسینا کے سربراہ ادھو ٹھاکرے نے اپنے خطاب کے دوران کہا کہ 'ہمارے اراکین اسمبلی کی تعداد اتنی ہوگئی ہے کہ اب ہم سب ایک فوٹو میں نہیں آ رہے ہیں اور اب ہم بتائیں گے کہ شیوسینا کیا چیز ہے۔'

اس کے علاوہ این سی پی کے سربراہ شرد پوار نے کہا کہ 'بی جے پی نے غلط طریقے سے حکومت بنائی ہے۔ ہم پانچ برس کے لیے نہیں بلکہ 50 برس کے لیے آئے ہیں۔'

انہوں نے کہا کہ 'یہ مہاراشٹر ہے گوا نہیں جو بی جے پی غلط طریقے سے حکومت بنا لے گی۔'

شرد پوار نے مزید کہا کہ 'اجیت پوار نے سب کو گمراہ کیا ہے۔ اب وہ کوئی فیصلہ نہیں لے سکتے اور اب اجیت پوار کے خلاف کارروائی کی جائے۔'

تمام ارکان اسمبلی کو عہد دلایا گیا

اس گیٹ ٹو گیدر پروگرام میں تمام ارکان اسمبلی کو عہد دلایا گیا کہ 'ہم قسم کھاتے ہیں کہ ہم شرد پوار، سونیا گاندھی اور ادھو ٹھاکرے کی سربراہی میں کام کریں گے اور پارٹی کے ساتھ ایماندار رہیں گے۔'