Job Fair Held in Aurangabad: اورنگ آباد جاب میلے میں 1500 سے زیادہ امیدواروں کا سلیکشن

اورنگ آباد کے رکن پارلیمان سید امتیاز جلیل کی نوجوانوں کو روزگار سے جوڑنے کی کوششیں رنگ لارہی ہیں۔ جاب الرٹ کے تحت کئی بچوں کو روزگار فراہم کیا گیا ہے۔ دن بھر چلے اس کیمپ میں چار ہزار سے زائد امیدواروں نے ملازمت کے لیے رجسٹریشن کیا تھا جن میں سے سولہ سو امیدواروں کو موقع پر ہی سلیکشن لیٹر دیا گیا۔ Job Fair Held in Aurangabad

اورنگ آباد:کورونا وبا کے سبب ملک میں بے روزگاری کی شرح میں تیزی سے اضافہ ہوا ہے۔ صنعتی شہر اورنگ آباد میں بھی ہزاروں نوجوانوں کو ملازمتوں سے محروم ہونا پڑا۔ بدلتے حالات اور تقاضوں نے نوجوانوں سے ان کا روزگار چھین لیے۔ ایسے میں اورنگ آباد کے رکن پارلیمان سید امتیاز جلیل کی کاوشوں سے محض ایک دن میں سولہ سو ستر نوجوانوں کو مختلف کمپنیوں میں ملازمت ملی، خاص بات یہ ہے کہ ملازمت پانے والوں میں بارہویں سے لے کر گریجویٹ اور پوسٹ گریجویٹ شامل ہیں۔ Job Fair Held in Aurangabad

ایم پی جلیل کے دفتر میں اس جاب میلے کا انعقاد ہوا، دن بھر امیدواروں کا ہجوم رہا۔ ایک درجن کمپنیوں کے ماہرین نے اس میلے میں ضرورت مند اور باصلاحیت افراد کو منتخب کیا۔ کمپنی کے ذمہ داروں کا کہنا ہے کہ کیمپس سلیکشن میں نوجوان عموماً تفریح کے طور پر انٹرویو دیتے ہیں لیکن یہاں ہمیں ضرورت مند اور باصلاحیت امیدوار ملے۔ سب سے زیادہ ویراگ کمپنی اور جسٹ ڈائل کے لیے سلیکشن کیے گئے۔

بے روزگاری کا اندازہ اس بات سے لگایا جاسکتا ہے کہ اس میلے میں مراٹھواڑہ کے مختلف اضلاع سے نوجوان حصول ملازمت کے لیے اورنگ آباد پہنچے۔ دن بھر انٹرویو کا سلسلہ جاری رہا۔ متعدد نوجوان ایسے بھی ملے جو پچھلے پانچ برسوں سے مسلسل ملازمت کی تلاش میں سرگرداں تھے اور انھیں روزگار مل گیا۔ واضح رہے کہ ایم پی جلیل کی قیادت میں پچھلے چار سال سے جاب میلے کا انعقاد ہو رہا ہے۔