آرے کالونی میں میٹرو ٹرین کا شیڈ بنانے کی تیاری کی جارہی ہے اور شیڈ کی تعمیر کے لیے ایک بڑی اراضی درکار ہے اور تقریباً 2600 پیڑوں کو اس کے لیے کاٹا جارہا ہے۔
حالانکہ شہر کی متعدد ماحول دوست تنظیمیں اور عوام اس کی مخالفت کر رہے ہیں کیونکہ ان کے مطابق اس سے شہر کے آب و ہوا اور ماحولیات پر برا اثر پڑے گا۔
علاقے میں لوگ پورے شہر سے پہنچ رہے ہیں معاملے کی سنگینی کو دیکھتے ہوئے پولیس انتظامیہ نے پورے علاقے میں دفعہ 144 کو نافذ کردیا ہے۔ اور اس جانب آنے والے کئی راستوں کو بند کردیا گیا ہے۔
آرے کالونی میں درختوں کی کٹائی پر عوام کا احتجاج
بامبے ہائی کورٹ نے آرے کالونی کو جنگل کا علاقہ قرار دینے کی تمام عرضیوں کو خارج کردیا جس کے بعد جمعہ کی شب سے ہی پیڑ کاٹنے کا سلسلہ شروع ہو گیا۔
اس معاملے میں متعدد سیاسی رہنماؤں کے ساتھ بالی ووڈ کی کئی بڑی ہستیوں نے بھی مخالفت کی ہے۔
سینا کے یوتھ ونگ کے صدر آدتیہ ٹھاکرے نے بی جے پی کی مرکزی حکومت پر نشانہ سادھا ہے۔
ٹھاکرے نے ٹوئیٹ کر کے کہا ہے کہ۔ مرکز کی جانب سے وزارت ماحولیات کا پلاسٹک پر پابندی کا کوئی مطلب ہی نہیں ہے، جب ممبئی میٹرو بغیر سوچے سمجھے آرے اراضی کو برباد کر رہا ہے اور میٹرو نے اسے اپنی انا کا مسلۂ بنا لیا ہے اس نے میٹرو کے مقصد کو ہی تباہ کر دیا'۔
واضح رہے کہ بامبے ہائی کورٹ نے جیسے ہی آرے کالونی کے پیڑ کاٹے جانے کے خلاف دائر عرضیوں کو خارج کیا اس کے فوراً بعد پیڑوں کی کٹائی کا کام شروع کردیا گیا جس کی ہر طرف سے مخالفت کی کارہی ہے۔
سیکڑوں مظاہرین میٹرو ریل سائٹ پر پہنچ کر نعرے بازی کی جس کے بعد پولیس نے درجنوں افراد کو گرفتار کیا۔
