Schools Will Continue to Close in Aurangabad: اورنگ آباد میں 24 جنوری سے نہیں کھلیں گے اسکول

ریاست مہاراشٹر میں 24 جنوری یعنی پیر کے دن سے تمام اسکولوں کو کھول دیے جائیں گے، لیکن اورنگ آباد شہر میں 24 جنوری سے تعلیمی ادارے نہیں کھولے جائیں گے اورنگ آباد میونسپل ایڈمنسٹریٹر آستک کمار پانڈے Aurangabad Municipal Administrator Astik Kumar Pandey نے کہا ایک ہفتہ تک جائزہ لیا جائے گا۔ پھر اسکول کھولنے پر فیصلہ کیا جائے گا۔

اورنگ آباد میں کورونا Corona Virus In Aurangabad کے مریضوں کی تعداد میں اضافے کے باعث یہ فیصلہ کیا گیا۔ مہاراشٹر میں 24 جنوری سے تمام اسکولوں کو کھول دیا جائے گا، اس طرح کا فیصلہ ریاستی کابینہ میں لیا گیا ہے، لیکن اورنگ آباد میونسپل کارپوریشن کے ایڈ منسٹریٹر آستک کمار پانڈے نے اورنگ آباد شہر میں کورونا کے مریضوں کی تعداد میں اضافے کو دیکھتے ہوئے ایک ہفتے تک اسکول بند رکھنے کا فیصلہ کیا ہے۔

اس سلسلے میں پانڈے کا کہنا ہے کہ شہر میں کورونا کی وبا پر قابو پانے کے لیے ہر ممکن اقدامات کیے جارہے ہیں تاہم مریضوں کی تعداد میں ہر گزرتے دن کے ساتھ اضافہ ہورہا ہے۔ ایسے حالات میں اسکولوں میں تعلیمی سرگرمیوں کی اجازت دینا بچوں کی صحت کے لحاظ سے مناسب نہیں اس لیے ایک ہفتے تک جائزہ لیا جائے گا اور ایک ہفتے کے بعد مستقبل میں کیا کرنا ہے اس کا فیصلہ کیا جائے گا۔

واضح رہے کہ اورنگ آباد شہر میں ابھی کورونا کے مریضوں کی تعداد میں تشویش ناک اضافہ ہورہا ہے۔ پچھلے دو دنوں میں تین سو سے زیادہ مریض پازیٹیو پائے گئے تھے، شہر کے مختلف اسپتالوں میں ابھی کورونا کے دیڑھ ہزار سے زائد مریض زیر علاج ہیں۔

کارپوریشن انتظامیہ نے احتیاطی اقدامات کیے ہیں اور شہریان کو محتاط رہنے کی اپیل بھی کی جارہی ہے لیکن سخت پابندیوں سے گریز کیا جارہا ہے۔ کارپوریشن کے ہیلتھ شعبے سے وابستہ افسران کا کہنا ہے کہ یومیہ بنیاد پر مانیٹرنگ کی جارہی ہے اور اس بات کو یقینی بنایا جارہا ہے کہ کسی طرح حالات معمول پر آجائے۔