اورنگ آباد کے تعلیمی اداروں میں درس و تدریس کا عمل بحال

اورنگ آباد کے تعلیمی اداروں میں درس و تدریس کا عمل شروع ہوچکا ہے، شہر کے تقریباً تمام تعلیمی اداروں کو مشروط اجازت دے دی گئی ہے، ششم جماعت سے لے کر ہشتم جماعت تک کے طلبا و طالبات کے لیے اسکول کھول دئے گئے ہیں۔ اس کے لیے شہر کے سینکڑوں اساتذہ اور غیر تدریسی عملے کا کورونا ٹیسٹ بھی کیا گیا ہے۔

لاک ڈاؤن کے بعد پورے دس مہینے بعد مہاراشٹر کے اورنگ آباد شہر کے اسکولوں کی محدود پیمانے پر ہی رونق بحال ہوئی ہے، حکومت کی گائیڈ لائنس کے مطابق ششم سے بارہویں جماعت تک کے طلبا و طالبات کو اسکول جانے کی اجازت ہے، اس کے لیے والدین کی تحریری رضامندی لازمی ہے۔

تحریری رضامندی کی بنیاد پر ہی طلبہ کو اسکول میں داخلہ مل رہا ہے، کورونا وبا کے سبب تعلیمی اداروں میں احتیاطی تدابیر پر سختی سے عمل کیا جارہا ہے۔ ماسک، سینیٹائزر اور تھرمل گن سے طلبا کی جانچ کی جارہی ہے۔

تعلیمی اداروں کے ذمہ داروں کا کہنا ہے کہ حکومت کی گائیڈ لائن پر سختی سے عمل کیا جارہا ہے تاکہ طلبا وطالبات کو اس وبا سے محفوظ رکھا جائے۔

کئی مہینوں کے بعد اسکول کا رخ کرنے والے طلبا میں خوشی دیکھی گئی تاہم امتحانات کو لیکر یہ طلبا و طالبات فکر مند بھی ہیں کیونکہ امتحانات کی تیاری کے لیے انھیں وقت کافی کم مل رہا ہے، حالانکہ آن لائن درس وتدریس کا سلسلہ بدستور جاری رہا لیکن اردو میڈیم کے طلبا نے اس کے تعلق سے کافی شکایات بھی کیں۔

میونسپل کارپوریشن حدود میں تعلیمی اداروں کو کھولنے سے قبل تمام اداروں سے وابستہ تدریسی اور غیر تدریسی عملے کا آرٹی پی سی آرٹیسٹ کروایا گیا، یہ ٹیسٹ مرحلہ وار طریقے سے کیے گئے ٹیسٹ میں جو لوگ پازیٹیو پائے گئے انھیں روک دیا گیا ہے۔