مہاراشٹر: سیلاب متاثرین کی مدد کے لیے مدرسہ بنا مفت سپر مارکیٹ

کوکن خطے میں رتناگری کے کونڈیورے گاؤں میں اس مدرسے کے دروازے سیلاب زدگان کی مدد کے لئے کھول دیئے گئے ہیں یہ مدد کسی ایک طبقے یا مذہب کے لئے نہیں ہے بلکہ ہر اس فرد کے لئے ہے جس کا سب کچھ سیلاب کی نذر ہوگیا ہے۔

مدرسہ دارالعلوم امام احمد رضا جہاں بچوں کی تعلیم تربیت ہوتی تھی اس وقت یہ ایک شاپنگ مال ایک بازار کے جیسا ہے، یہاں زندگی سے جڑی ہر وہ بنیادی اشیاء موجود ہے جس کی سیلاب زدگان کو ضرورت ہے۔

اس ریلیف سینٹر میں کھانے پینے کی اشیاء کے علاوہ روزمرہ کی زندگی میں استعمال ہونے والی تمام چیزیں موجود ہیں، جیسے گیس کا چولہا، برتن، مکسر، پنکھا، مرد و خواتین کے کپڑے سب کچھ دستیاب ہیں۔ جسے ضرورت مند بے جھجھک لے سکتے ہیں۔

آپ کو بتاتا چلوں کہ حال ہی میں کوکن خطے میں سیلاب کے سبب کوکن کے کئی علاقے تباہ ہوگئے ان میں چیپلون، مہاد، کھیڈ، داسگاؤں، راجے واڑی، مٹوان، السور، سنگامیشور تعلقہ وغیرہ سیلاب سے متاثر ہوئے ہیں۔

یہاں ریلیف کا کام بڑے پیمانے پر کیا جا رہا ہے۔ حالانکہ یہ ذمہ داری حکومت کی ہے لیکن اس وقت ملی اور سماجی تنظیموں کی وجہ سے سیلاب زدگان کے حالات بہتر بنانے کے بارے میں سوچا جا رہا ہے۔ مدرسے کے منتظمین کارکنان تباہ ہوئے علاقوں کا جائزہ لے رہے ہیں اور اُنہیں مفت کوپن تقسیم کر رہے ہیں اسی کوپن کے ذریعے متاثرہ افراد یہاں آتے ہیں اور اپنی ضروریات کی ساری چیزیں لے کر جاتے ہیں۔