اَن لاک شہروں کی فہرست میں مالیگاؤں کا نام نہ ہونے پر عوام میں ناراضگی

مالیگاؤں شہر کو اَن لاک کی فہرست میں شامل نہ کرنے پر قدوائی روڈ ہاکرس یونین سمیت شہر کے عوام میں سخت ناراضگی پائی جا رہی ہے۔

مہاراشٹر حکومت کی جانب سے ریاست کے متعدد اضلاع میں اَن لاک کا اعلان کیا گیا لیکن اس فہرست میں شہر مالیگاؤں سمیت ضلع ناسک کا نام شامل نہیں ہے جس کے بعد قدوائی روڈ ہاکرس یونین نے ناراضگی کا اظہار کیا۔

اس تعلق سے قدوائی ہاکرس یونین کے جنرل سکریٹری فاروق فردوسی نے کہا کہ 'حکومت نے اَن لاک کی فہرست میں ضلع ناسک کا نام شامل نہیں کیا ہے اور آگے یہ نہیں کہا جا سکتا ہے کہ حکومت اس ضلع میں مزید سختی نافذ کردے لیکن اگر اب ایسا ہوتا ہے تو ہاکرس اور پاورلوم مزدوروں پر پہلے سے زیادہ برے اثرات مرتب ہوں گے۔

انہوں نے ریاستی حکومت، ناسک ضلع کے رابطہ وزیر چھگن بھجبل اور ضلع کلکٹر سے مطالبہ کیا ہے کہ مالیگاؤں سمیت پورے ناسک ضلع کو اَن لاک کی فہرست میں شامل کیا جائے اس کے بعد حکومت کی جانب سے جاری کردہ تمام گائیڈ لائنز پر شہریان عمل کریں گے۔

واضح رہے کہ ضلع ناسک میں بھی اب کورونا وائرس سے ہونے والی اموات کی شرح میں کمی دیکھی جارہی ہے اسی کا حوالہ دیتے ہوئے متعدد سماجی کارکنان نے مطالبہ کیا ہے کہ اب شہر میں رفتہ رفتہ لاک ڈاون ہٹادیا جانا چاہیے۔