زرعی قوانین کے خلاف آزاد میدان میں احتجاج

ممبئی کے آزاد میدان میں کسانوں کی حمایت اور زرعی قوانین کی مخالفت میں 100 سے زائد غیر سرکاری تنظیموں نے احتجاج کیا۔

مرکزی حکومت کے نئے زرعی قوانین کے خلاف ممبئی کے آزاد میدان میں زبردست احتجاجی مظاہرہ ہوا۔ اس مظاہرے میں 100 سے زیادہ تنظیموں نے حصہ لیا۔ مظاہرے میں جہاں بڑی تعداد میں لوگوں نے شرکت کی وہیں، خواتین کی تعداد میں قابل ذکر تھی۔ مظاہرین ممبئی کے اسلام جم خانہ کے پاس سے پیدل چلتے ہوئے آزاد میدان پہنچے۔

اس دوران سماجوادی پارٹی کے رکن اسمبلی ابو عاصم اعظمی بھی کسانوں کی حمایت میں احتجاج کرنے پہنچے۔ انہوں نے ای ٹی وی بھارت سے بات کرتے ہوئے کہا کہ کسانوں کی حق کی لڑائی میں بہت سی غیر سرکاری تنظیمیں اور لوگ بغیر کسی سیاسی مفاد کے کے شانہ بشانہ کھڑے ہیں۔

ساتھ ہی انہوں نے کہا کہ یہ 130 کروڑ عوام کا سوال ہے۔ جو کسان احتجاج کر رہے ہیں ان کا احسان ہے کہ وہ تمام مصیبتوں کو جھیل کر سب کے حق کی لڑائی لڑ رہے ہیں، لیکن حکومت ان کی سن نہیں رہی ہے۔