اورنگ آباد میں لاک ڈاون کے خلاف منگل کو مظاہرہ

مہاراشٹر کے اورنگ آباد میں کورونا وائرس انفیکشن کے بڑھتے معاملات کے پیش ںطر ریاستی حکومت کے 10 دن کے لاک ڈاون کی تجویز کے خلاف اے آئی ایم آئی ایم کے رکن پارلیمنٹ امتیاز جلیل نے منگل کو احتجاجی مظاہرہ کی حمایت کنڑ علاقہ کے سابق ایم ایل اے ہرش وردھن جادھو نے بھی کی ہے۔

ہرش وردھن جادھو کا ایک ویڈیو سوشل میڈیا میں وائرل ہورہا ہے جس میں انہوں نے کہا ہے کہ عوام کے واسطے آوازاٹھانے کے لئے وکاس اگھاڑی کے کارکن رائے بھان جادھو اور وہ خود احتجاجی مظاہرہ میں شامل ہوں گے۔

امتیاز جلیل نے کل صحافیوں سے کہا تھا کہ اورنگ آباد شہر میں لاک ڈاون لگانے کے خلاف پیٹھن گیٹ سے ضلع مجسٹریٹ کے دفتر تک مظاہرہ کیا جائے گا۔

انہوں نے کہا کہ بڑے تاجر اور ایئرلائنس اپنا کاروبارکررہے ہیں لیکن دوسری جانب چھوٹے تاجر، ہوٹل، ڈرائیور، مزدور اوردیگر کاکام بندکردیا گیا جس سے غریبوں کی پریشانی میں اضافہ ہوگیا ہے۔ کورونا وائرس کے دوران پہلے ہی معاشی حالت خراب ہوچکی ہے۔ اگر کوئی سماج کے لئے لڑرہاہے تو بغیر کسی امتیاز کے اس کی حمایت کرنی چاہیے۔