Police Arrest Six Person انڈرولڈ ڈان چھوٹاراجن کے مداحوں پر پولیس کارروائی, 6 گرفتار

ممبئی انڈرورلڈ کا بھلے ہی قلع قمع کرنے کا دعوی پولیس کر تی ہے لیکن اب بھی انڈرورلڈ ڈان کے گرویدہ اور مداحوں کی تعداد میں کوئی کمی واقع نہیں ہوئی ہے ممبئی میں جیل میں مقید بدنام زمانہ غنڈہ بدمعاش اور انڈرورلڈ ڈان چھوٹا راجن کی سالگرہ پر کبڈی مقابلہ کا بینر ممبئی شہر میں سر راہ لگایا گیا ہے اس میں چھوٹاراجن کو مبارکباد بھی دی گئی ہےPolice Arrest Six Person

ممبئی: انڈرولڈ ڈان چھوٹاراجن کے پوسٹر اور بینر کے ممبئی شہر میں چسپاں ہونے کے بعد یہ خبر تیزی سے وائرل ہوگئی۔اس کے بعد پولیس حرکت میں آگئی۔اس نے یہاں سے انڈر ورلڈ ڈان کا پوسٹر ہٹا دیا اور کارروائی بھی کی ہے۔ پولیس نے کبڈی مقابلہ کے منتظمین پر کارروائی کا بھی دعوی کیا ہے ۔بتایا جاتا ہے کہ چھوٹا راجن کے سالگرہ پر جشن منانے کے احکامات ازخود چھوٹاراجن نے ہی جاری کئے تھے۔ اس لئے ممبئی میں اس کا بینر لگایا گیا تھا. چھوٹاراجن کا گڑھ ممبئی کا چمبور علاقہ ہے۔ یہاں سے ہی اس نے انڈرورلڈ کی دنیا میں قدم رکھا تھا اور اس نے مضافاتی علاقوں میں بعد میں حکمرانی کی۔

1993 ء میں بم دھماکوں کے بعد باقاعدہ طو رپر چھوٹاراجن نے خود کو داؤد ابراہیم گینگ سے علیحدہ کر لیا تھا۔ اپنی خودمختاری کا دعوی کیا تھا داؤد ابراہیم سے علیحدگی کے بعد چھوٹاراجن اور روی پجاری نے خود ساختہ ہندو ڈان بن گئے۔ یہ بینر سوشل میڈیا پر وائرل ہوا تھا اس میں 14 اور 15 جنوری کو شام 6بجے کبڈی مقابلہ منعقد کیا گیا تھا. ممبئی پولیس نے بینر پر کارروائی کر نے کے بعد منتظمین سے باز پرس بھی شروع کردی ہے .اس سے قبل 2020 ء میں بھی چھوٹاراجن کے سالگرہ پر ممبئی میں پوسٹر اور بینر لگایا گیا تھا۔

اس پر بھی پولیس نے کارروائی کی تھی اور معاملہ درج کر لیا گیا تھا. لیکن اس مرتبہ پولیس نے اس معاملہ میں سخت کارروائی کرتے ہوئے 6 افراد پر معاملہ درج کر کے گرفتار کر لیا ہے .پولیس اس معاملہ میں مزید تفتیش کررہی ہے۔ ڈی سی پی زون 12 کی ڈی سی پی اسمیتا پاٹل نے اس کی تصدیق کی ہے۔

پولیس یہ معلوم کر رہی ہے کہ یہ بینر ان ملزمین نے کس کے اشارے پر چسپاں کئے تھے اور بینر لگانے کا مقصد کیا تھا. انڈرورلڈ کی دنیا کی چکا چوند سے نوجوان پہلے متاثر ہوتے تھے لیکن جب پولیس نے انکاؤنٹر شروع کیا تھا. پھر نوجوانوں میں انڈرورلڈ کے تئیں نفرت پیدا ہوئی تھی.وہ انڈرورلڈ کے انجام سے بھی خوفزدہ تھے لیکن اب دوبارہ نوجوانوں انڈرورلڈ ڈان کیلئے محبت پائی جارہی ہے جسکے بعد پولیس نے اس پر سخت ایکشن لیا ہے۔