'مودی کو بے روزگاری اور معیشت کے بارے میں بات کرنی چاہئے تھی'

شیوسینا نے یومِ آزادی کے موقع پر وزیراعظم نریندر مودی کے ملک سے خطاب سے متعلق نکتہ چینی کی ہے۔

شیوسینا نے پیر کے روز کہا کہ وزیر اعظم نریندر مودی کو یوم آزادی کے موقع پر ملک سے خطاب میں روزگار پیدا کرنے اور معیشت کی بحالی کے اقدامات کے بارے میں بات کرنی چاہئے تھی۔

شیوسینا کے ترجمان سامنا نے بتایا کہ وزیر اعظم نے اپنی تقریباً 9 منٹ کی تقریر میں بھارت میں کورونا ویکسین کے ٹرائلز، ملک کی دفاعی صلاحیت، نیشنل ڈیجیٹل ہیلتھ مشن سمیت دیگر معاملات کے بارے میں بات کی لیکن سوال کیا کہ آیا 'آتم نربھر' بھارت اسکیم کے ذریعے کورونا وائرس وبائی امراض کی وجہ سے پیدا ہونے والے معاشی بحران پر قابو پایا جا سکے گا؟

انہوں نے کہا کہ کورونا وائرس لاک ڈاؤن کے دوران اب تک ملک میں تقریباً 14 کروڑ افراد اپنی ملازمت سے ہاتھ دھو بیٹھے ہیں۔ مستقبل میں اس تعداد میں اضافہ ہونے جا رہا ہے۔ لوگوں کو گھروں سے نکلنا ہوگا لیکن جب وہ باہر نکلیں گے تو وہ کیا کریں گے؟ نوکری، کاروبار اور روزگار تباہ ہوچکا ہے۔ یوم آزادی کی تقریر میں اگر وزیر اعظم ان کے بارے میں بات کرتے تو بہتر ہوتا۔'

سینا نے مزید کہا کہ 'اگرچہ ہمارے ملک کی فوج اور فضائیہ ملک کی سرحدوں کی حفاظت اور دشمنوں سے لڑنے کے لئے موجود ہے لیکن ہم ملک میں بھوک اور بے روزگاری کے شیطان سے کیسے مقابلہ کریں گے؟'

شیوسینا نے یوم آزادی کے موقع پر وزیر دفاع راجناتھ سنگھ کی تقریر بھی طنز کیا۔

انہوں نے کہا کہ 'وزیر دفاع راجناتھ سنگھ نے یوم آزادی کے موقع پر پرچم کشائی کے دوران کہا تھا کہ بھارت عالمی معیشت کو تیز کرنے کی صلاحیت رکھتا ہے۔ دنیا کو چھوڑ دیں آپ ملک کی معیشت کو تیز کرو۔ یوم آزادی آتا ہے اور جاتا ہے، لال قلعہ ایک ہی ہے اور پریشانی اب بھی ایک جیسی ہے۔