اورنگ آباد شہر کو مہاراشٹر کا سیاحتی دارالحکومت کا درجہ حاصل ہے لیکن کورونا وائرس کی وجہ سے سیاحتی مقامات کو بند کرنے کی وجہ سے درجنوں افراد ایک بار پھر بیروزگاری کے دہانے پر پہنچ گئے ہیں۔
مختلف ممالک سے ہزاروں سیاح اورنگ آباد کا رخ کرتے ہیں لیکن کورونا وبا کے باعث اس شہر کے تمام سیاحتی مقامات کو ایک بار پھر تالہ لگ گیا۔
ٹوریزم انڈسٹری سے وابستہ لوگوں کو شکایت ہیکہ جزوی لاک ڈاؤن کے دوران شاپنگ مالز کو کھلا رکھنے کی اجازت ہے تو پھر سیاحتی مقامات ہی کیوں نشانے پر ہیں جبکہ ضلع انتظامیہ کا کہنا ہیکہ حالات نارمل ہوتے ہی تاریخی اور سیاحتی مقامات کو دوبارہ کھول دیا جائیگا۔
اورنگ آباد شہر میں جزوی لاک ڈاؤن نافذ ہے۔ ہر گزرتے دن کے ساتھ کورونا مریضوں کی تعداد میں اضافہ ہورہا ہے۔ صورتحال کی سنگینی کو دیکھتے ہوئے ضلع انتظامیہ نے اب ہوٹلوں کو بھی بند رکھنے کا اعلان کیا ہے۔ ایسے حالات میں لوگ اپنے روزگار کے تعلق سے فکر مند ہوگئے ہیں۔